King Sir追思會
姪兒鍾至權致辭
憶述King Sir遺言：我今日好開心
劇劇生涯之始：幼稚園扮羊咩仔
中學時期曾婉拒秦劍拍戲之邀
戲劇大師鍾景輝（King Sir）追思會，今日假座香港演藝學院演藝劇院舉行。追思會以「小城風光」為主題，現場播放追思影片，並邀請學生與嘉賓分享King Sir生前點滴。香港演藝學院並安排追思會於網上直播。
追思會於下午三時十五分開始，先由King Sir姪兒鍾至權致詞。他說King Sir平時喜歡打麻雀，笑：「我坐King Sir下家，我每次叫糊嘅牌，King Sir都會扣實晒，所以次次都係我輸，好彩我哋冇計錢，只係娛樂下啫！」
「伯爺仲好鍾意做牌，嗰次佢做咗十三么，仲食出咗，嗰次佢真係好開心。但有一次佢仲開心，就係我結婚，我同老婆斟茶畀佢，嗰次佢笑得更加燦爛。」
︱離世前最後的話：我今日好開心︱
鍾至權謂，今年King Sir已無甚精神打牌，在其人生倒數最後一星期，他拿了一副麻雀來探King Sir，跟學生砌了一副十三么，那次King Sir非常開心。
離世前數天，每天都有朋友來探望King Sir，「佢仲睇緊《金池塘》，到最後一日，學生嚟陪佢傾吓偈、食雪糕；學生走咗之後，佢留低畀大家最後一句說話：我今日好開心。」
︱心願：戲劇能於中學普及成科︱
King Sir一直希望，戲劇能於中學普及成科，甚至成為計分科。他認為戲劇訓練不止教人做戲，還教人做人及培養自信心、團隊精神，因為演員需要用同理心理解每個角色的遭遇及生命。
鍾至權續謂，近數年King Sir已沒體力再親身到劇院欣賞舞台劇，學生便share演出link，讓King Sir慢慢看。「當舞台嘅音樂一響起，燈光一打落去，伯爺當堂精神晒，睩大對眼望住電視，好全神貫注咁欣賞演出。」
「伯爺對舞台劇嘅熱愛，真係由後生到老都冇變過。」他引述King Sir自傳《寬實清和．鍾景輝》所寫：「世界上嘅一切一切，我真係覺得我嘅一生好幸運；人生係好美好嘅，因此我會用有限嘅時間，做最多嘅嘢。如果有一日我要走，我諗，我會唔捨得呢度嘅一切。」
︱中學時期曾婉拒秦劍拍戲之邀︱
追思會亦播放了King Sir生前專訪片段，他笑言讀幼稚園時，一年聖誕節，老師找他做話劇，扮「羊咩仔」，「嗰陣我扮羊咩仔已經好開心，成日諗住點樣叫嘅呢？咩咩咩咩咩…覺得好開心。」並視為畢生戲劇起點。
