唔知有冇人同我一樣，愈大個愈覺得好多嘢都好虛無。
細個成日聽人講，要讀好書、入好大學、搵份好工，將來就會有好生活。但大個之後先發現，就算你做到社會眼中所謂成功，其實都未必真係有幾大意義。每日返工、處理一堆重複嘅嘢、應付制度、應付人際關係，慢慢個人就好似變成一粒齒輪。
有啲人話每份工都有貢獻社會，但有時真係會諗，自己每日做嘅嘢，到底真係有幾多價值？定只係用自己一個月嘅時間，換返一筆只夠生存嘅錢？香港咁多人辛苦做足成世，最後都只係勉強生活，而有啲人一個故事、一個包裝、一個概念，就可以攞到幾百萬投資。唔係話人哋一定唔值得，而係個世界嘅價值好似好多時都唔係由實質貢獻決定，而係由包裝、資源、運氣同其他人信唔信你決定。
再睇社交媒體同廣告，成日將普通人、普通產品、普通故事包裝到好似好特別。所謂 model、KOL、成功人士、勵志故事，好多時都只係有資源、有團隊、有角度去包裝。拉遠啲睇，其實好多人同好多事都冇想像中咁特別，只係被市場同媒體放大咗。
再拉遠啲睇，新聞每日講到邊個好勁、邊個好成功、邊件事好大件事，但其實喺世界角度，可能根本冇人在乎。人同人之間不斷競爭、比較、爭資源、爭認同，但地球照樣轉，宇宙更加完全唔 care。諗到呢度，有時真係會覺得好虛無。
唔係話想死，亦唔係想扮深沉，只係有時會突然覺得：大家咁辛苦追求嘅嘢，到底係咪真係有意義？定只係一個又一個社會建構出嚟嘅遊戲？
有冇人都有類似感覺？
