COLLAR成員王家晴（Candy）係組合中嘅「顏值擔當」，加上由《全民造星IV》時期開始進步神速，吸引眾多粉絲支持。不過，原來女神都係人哋嘅粉絲？有網民近日喺討論區以「原來candy曾經係好鵬友」為題出PO，內容貼出多張Candy於2016年讚好陳展鵬多個帖文嘅截圖，令大家發現原來Candy係「好鵬友」（ 陳展鵬粉絲名稱）。

網民翻查陳展鵬2016年嘅IG帖文，發現Candy幾乎每個帖文都會畀Like，由陳展鵬赤裸上身露腹肌嘅《城寨英雄》劇照開始Like，直至2017年先無再畀Like，而當時Candy僅14歲。唔少網民都覺得全盛時期嘅陳展鵬係幾吸引，直言Candy識貨：「煎PAN全盛果排係幾正」、「Candy識貨」、「留鬚戴眼鏡都幾型」、「一定係望到亞視張相迷上了」、「係少女時代ig like 煎pan嘅相」、「鐘意電視明星其實有咩問題？煎pan都算有外形又大隻。著西裝真係幾靚仔」等等。不過，更多網民關心樓主，認為樓主有機會係陳展鵬忠實粉絲：「樓主點發現的，樓主都係好鵬友？仲要睇咁舊嘅post」、「樓主癲到碌煎pan po碌到2016」、「樓主先係真正既好鵬友，咸豐年前都搵到」、「點解你會睇陳展鵬七年前既post」等等。