丹麥球星基斯甸艾歷臣再次喺比賽中暈倒，一眾隊友表現非常驚慌，丹麥足總證實將對球員提供心理輔導，而朗尼、亨利等名宿同大批網民，都呼籲34歲嘅艾歷臣要為生命同家人着想，提早掛靴。

繼5年前歐國盃後，再次喺球場上暈倒，韋利安奧索拿等小將都激動到即場落淚，丹麥總監彼德慕拿賽後宣布：「所有球員唔可以單獨返屋企，要家人或者同其他人同行，領隊未來幾日會逐個打電話，睇下佢哋有冇需要幫助。」

艾歷臣健康再響警號，唔少球迷同名宿都認為，呢位丹麥傳奇應該提早掛靴，法國名宿亨利表示：「有時足球會變到無關痛癢，我見到嘅艾歷臣唔係球員，而係一個丈夫、一個爸爸、仔同埋朋友。當佢第1次暈倒，重返球場係要莫大勇氣，但冇人想見到呢件事再三發生，而依家最大嘅勇氣，係要接受有啲事凌駕於足球，家人係永遠無法取代。」

英格蘭名宿朗尼亦表示：「當生命受威脅，足球就唔再重要，如果艾歷臣考慮退休，我100%支持。我唔可以幫其他人決定，艾歷臣已經為足球奉獻一切，佢有細路同家庭，離開足球係最困難嘅決定，但如果醫生話太危險，佢一定要聽。」