一係唔去，一係就兩個禮拜之內去咗兩次廣州。我知道唔少朋友都鍾意北上消費，但係我真係好佩服大家嘅精力。
好似我哋呢啲有番咁上下年紀嘅港島人，就算過西九搭高鐵去廣州，即日來回，我都真係覺得幾攰。齋車程都要個幾鐘，落咗車再轉車去其他目的地，都仲要行大段路，體力少啲都唔得，所以對我嚟講，留港消費都係比較合適嘅選項。
上次我辦完公事，就走咗去「永慶坊」行咗轉，今次我就真係純公幹，以顧問身分，出席研發電動車充電方案嘅本地企業 Halo Energy ，同內地電動車品牌小鵬汽車簽署合作協議，小鵬汽車將會提供叉電硬件嘅投資，以至擔保同保養。
叉電安排可以話係電動車發展嘅關鍵，所以小鵬汽車好重視呢方面嘅基建，大家都好希望喺呢項合作之下，最快推出閃電快叉 flash charge，有望唔駛十分鐘，就可以叉到八九成電，大大提高電動車嘅叉電效率。
之後，佢哋仲同我哋介紹小鵬汽車嘅最新業務發展，佢哋成間企業有三萬多名員工，當中約四成人係負責 R & D 研發嘅工作，做研發嘅員工比例咁大，自然會有唔少創新產品。佢哋就介紹咗最新嘅 Flying car、「飛天車」，只要打開呢部類似 RV 嘅六輪汽車尾艙，就可以見到一部可以載兩個人嘅飛行器。唔知呢部車有冇可能喺香港落地升空呢？
同場仲有佢哋自家開發嘅機械人同 AI 晶片，佢哋呢款機械人，模仿人類形態嘅形似度相當高，仲採用咗女性嘅體態，佢哋依家主要係訓練呢啲機械人執行唔同嘅指令。
內地大力搞創新科技，咁我哋又要點呢？
#都係適合留港消費
#HaloEnergy
#小鵬汽車
https://www.instagram.com/p/DY_LDIgCS8W/?img_index=1
![[369]](/faces/369.gif)
