英格蘭前鋒占美華迪上年夏天離開效力咗13年嘅李斯特城，轉投意甲球隊克雷莫納，但球隊護級失敗，將於下季降落意乙，占美華迪亦約滿離隊，英國《太陽報》指呢位39歲前鋒可能重投李斯特城。
由於占美華迪只係同克雷莫納簽約1年，加上球隊降班，雙方都決定唔續約，呢位老將恢復自由身之後，仍然未打算退役，並揚言將展開球員生涯新一頁。事實上，占美華迪仍然有心有力，今季為克雷莫納上陣29場入7球及3次助攻，英國《太陽報》指佢最大機會返回李斯特城。
占美華迪曾經為李斯特城上陣500場入200球，包括協助球隊爆冷奪得2015/16年球季英超冠軍，亦捧過2021年英足盃冠軍。李斯特城今季英冠排尾二，下季降落英甲，以占美華迪嘅級數，應付英甲賽事綽綽有餘，相信佢亦樂意回巢，協助「狐狸兵團」下季爭取升班資格。
![[sosad]](/faces/sosad.gif)
