無綫在2000年推出處境劇《男親女愛》，深受觀眾喜愛，當年黄子華和鄭裕玲的「世紀之吻」一幕，突破50點最高收視紀錄。《男親女愛》情節不拖拉，對白精警，特別是鄭裕玲和黃子華經常妙語連珠，讓大家看得很放鬆投入，全有賴編審鮑偉聰和林少枝創作出這麼好的劇本。
提到鮑偉聰這位金牌編審，任職無綫期間，創作過不少經典之作，包括《公司三汶治》、《壹號皇庭》系列、《笑看風雲》、《天地豪情》、《寵物情緣》、《男親女愛》、《皆大歡喜》、《珠光寶氣》等等；而在去年8月開始做網上節目《聰心直說》，間中都會評論劇集。
對於他筆下之作《男親女愛》，鮑偉聰在節目《聰心直說》透露，是為了諷刺無綫而撰寫一場性別戰爭，他說：「我離開咗TVB咁耐，或者在位嘅人都已經退咗休，所以我都唔怕講，我製作《男親女愛》嘅源起，其實我係洩憤，如果大家有留意，直至而家，TVB係一個女權至上嘅機構，掌握權力，或者掌握部門嘅生殺大權，到而家都係女人，雖然方逸華小姐已經不在，但大家諗吓，由方逸華去到下面嘅監製，好多都係由女性坐呢個位，所以有人開玩笑話，喺TVB做嘢嘅男人唔似男人，似咩呢？咁我唔方便講啦，係古時宮庭入面常見嘅人物囉，你哋自己想像吓啦，我就唔似嗰啲人，所以我唔係撈得好掂，又升唔到職，但我身為編審就經歷過晒呢啲嘢，所以我好自肥咁，將我曾經遇見過女上司嘅一啲唔合理、變態、搬龍門、自打嘴巴呢啲細節，全部放喺鄭裕玲角色『Miss Mo』入面，其實我係一種發洩，當然我用一種喜劇手法去表達出嚟，被醜化嘅人當然唔知我喺度醜化緊佢啦，又或者笑緊佢。」
至於黃子華角色就是當時所有男同事嘅縮影，鮑偉聰續說：「『Miss Mo』係都市女性、女強人，要配一個帶點粗鄙、下流、有高工作能力嘅小人物先至有衝擊，我係將男同事嘅素質放入去，大家可以想像喺1999年創作《男親女愛》嘅時候，我只係將TVB製作部濃縮咗落去呢套劇入面，呢套戲係自嘲，或者嘲笑人哋嘅行為，所以點解一出嚟就有人有共鳴，我相信香港工作環境，女人真係幾惡、幾巴閉。」
