然後我明白，真有一些人看上去正常不過，
如常工作如此交際，但內裡卻藏了一個畸形世界，
例如喜歡冒險隨街偷拍、收看大廈大門的閉路電視台、
收集陰毛、易服戀物等，他們都過著日常生活，
但生活背後卻有這些那些潛在興趣來滿足和補完太正常平凡的都市生活。
我或許已變成其中一份子，分別只是我的興趣不是一種實質活動，而是思念。
這活動又再維持了六十天。
「下星期公司船P，帶埋女友嚟吖？」鄰座的Eric問。
「哦我要問吓佢先，你知啦…做護士個更表唔穩定…」對，我女友仍然是一位護士。
「喂呀！我哋咁耐都未見過佢，你又唔肯帶出嚟！」其實不少人都有語癌。
「唉唷Even我都唔係成日見到佢，何況同你哋各位大佬巧遇呢！」
「懶神秘咁！會唔會連結婚都偷偷哋去個旅行仔就算㗎！」
「點會呢，小弟一定請晒各位嚟！我跳埋火圈娛賓又點話！」
「喂老老竇竇，其實你個女友係咪公司同事！講！」
「吓……？」
「唔准諗，即刻答！」
「唔…唔係呀！」
「嘿！仲唔俾我試到你！係，一定係！」
「唔係呀…係嘅話咁耐一定穿崩啦……」
「你個樣古古惑惑，一定係同事！」
「唔係呀……」
「哦！係唔係阿菲？」
「嘩點敢呀！我食咗仲唔俾各位大佬捅屎忽？」
「個個都𥄫到實，你反而擰歪面，仲唔係有嘢？」
「吓唔睇都唔得？」
「但太可疑喇，根本有違男人常理！」
「唔係呀…我呢啲毒男仔點敢褻瀆神靈呀……」
「屌有無睇佢Facebook？包你晚晚『洩』瀆啦哈哈哈！」
「係咩……」
「佢成個Facebook都係夏日驚喜，真係J出血……」
「係…係咩？」
「你就爽啦！」
「唔關我事㗎……」
「喂講真吖，阿菲好唔好砌啫？」
「呃……」
![[flowerface]](/faces/flowerface.gif)
