【殘忍的偷戀】原來愛上人妻比失戀更殘忍。三

林俊傑

25/01/2014 01:39

25. 初吻

「你陣間會返嚟公司嘛？」

載著Stanley和Wilson前往機場途中，
我收到Catherine的訊息，我知她想起我。
心不其然甜起來，甜得笑起來，
紅燈時，假裝Shoulder Check看窗把笑容釋放。
鄰座的Wilson沒有為意，
反而後座的Stanley見到：「喂！有乜咁開心要笑到咁，講出嚟同大家分享吓啦！」
我像個偷蕃薯的賊仔，聽到他一句心怯得要飛出窗外閃避。

「無…諗起屋企隻狗仔，個心甜咗吓之嘛……」
「啊？係咩種嚟？」想不到Wilson會關心起來。
「呃…Poodle嚟……」
「Poodle幾好喎！我都想買隻畀老婆！」
「係…？佢鍾意狗仔？」
「最主要係我成日唔喺香港，佢一個人喺屋企會好悶……」
「唔…都好嘅，不過狗仔都要好多心機照顧，又早死過你哋…」
「係啦…到第日走嗰陣又係好傷……」

「點…點解唔計劃生個BB？」
「唉我仲未有信心抽到時間湊BB……」
「其實都差唔多係時候要諗吓喇…？」
「結咗婚都已經唔見一大半私人時間，有埋個B，我諗我連自己都唔見埋…」
「咁Catherine有無話想生？」
「佢話唔想咁快……」
「你哋唔鍾意小朋友？」
「我OK㗎！」

「嗱第二樣可以唔信，小朋友佢就一定非常鍾意！」老闆橫刀截劫。
「呃…哈哈哈哈…係呀…哈哈哈哈哈……」Wilson笑得尤其尬尷。
「Pal你知唔知最好嘅避孕方法係咩？」
「唔……」
「就係中出人哋個老婆喇哈哈哈哈！」
「吓…」我呆了。
「哈哈哈………」Wilson笑得尷尬，但明明中出人家女友的是Stanley。
「兩位老闆，旅途愉快。」
「哈哈哈Pal你成日都咁Formal，放鬆啲啦！」
「係……」

James_May

25/01/2014 01:39

如果聽日買到新書,我都會繼續上黎追post

林俊傑

25/01/2014 01:39

把他們的行李搬出車尾箱，看著他們背影雙雙遠去之後，
便回到車箱拿起電話回覆那個不想太快生寶寶的楊太：「會，突然想起我？」
幾分鐘後，她發來一個令人春心蕩漾的回覆：「唔係突然。」

回到公司已是六時多，其實正常一個盡責員工在四時多外勤到機場，
一來一回兩小時後都不會回公司，但我就是那個例外。
這裡的周一，人們通常不加班，趕回公司後，
只見遠處三位設計師在打機…唔……

她大概等不到，早知把車再開快一點……
失望，一是見不到她，二是她的想念原來只是無聊時的寒喧。
我又被打進十八層永不超生。

等不了.

25/01/2014 01:40

幾年無買過書
~~唔計雜誌~~
忍唔住碌左奴兄呢本
由細到大睇感情野都唔鍾意sad ending
真係會跟住sad一排
寧願 happy 爛尾 :~(

林俊傑

25/01/2014 01:40

「嗨！」Catherine拿著水杯突然在後方出現，
把正沉寂在失落中的我嚇驚：「呃！！」
她一邊用紙巾抹乾手上的水杯，
一邊笑著說：「又要人約，又要人等！」
我連忙道歉，她得戚地笑起來說我只會道歉。

對，我有一種把她看待成主人的奴性，
做對了事會希望她稱讚，做錯了就只會道歉。
最怕的，就是下一秒被她遺棄。
Wilson說要買她一頭小狗，其實她早已有一頭，那就是我。
分別是我會說話、而Wilson又不知道。
但我並未為此感不悅，因為下班後主人又帶我去公園散步，汪！

林俊傑

25/01/2014 01:43

又來到這個漆黑而寧靜的步行徑，步進公園不久，
上一次的悸動再次從記憶中波動。情難自禁，我不發一言主動伸出手牽著她，
她沒有抗拒，任由我握著走，沒多說話，
就在柔柔的燈光中靜靜感受她掌心散發的微暖和我們的腳步聲。

我知她是喜歡我的，但或許只限在維園的範圍內。
這裡彷佛成了我們的結界，只有我們兩個人，
把現實中的一切拋開，享受她的Exclusive。

刻意放慢腳步拖延，
二十多分鐘的甜蜜還是光速一樣快，但想象卻比宇宙更大。
臨離開公園前，她依舊甩開我手，刻意拉遠一點距離。
但沒關係，能當十六號愛人已是相當的僥幸。

Wilson外遊成了我最美的日子，
這段時間無論下班後她有約或我有應酬，下班後我們也會一起走進結界，
然後默默牽著手走過漆黑，她由被我牽著到輕輕牽著我，以至成了習慣，
只要走進公園範圍，她便靠近到我那邊，
手提東西會改以另一邊手挽，騰出空間準備給我握著，
這小舉動令人感到萬二分窩心，回想我第一天偷看她、
然後我們第一天在升降機門外相遇、在K房第一次交談…
到現在牽手，當中可經歷了六萬多字的陳述，
以及六萬字以外沒細說的等待。

或許節奏太緩慢，來來回回停滯不前，浪費時間虛度光陰，
把女的膽大心細面皮厚要訣我全不精通，
就如我那年追看《求婚大作戰》和《草莓100%》時，
都為拖泥帶水畏手畏尾的男主角感到氣忿，十幾集無限拉布，
最後還是得不到好結果，懶淒美裝遺憾收場浪費觀眾時間……

但當事情發生在自己身上，原來一樣會如此翻來覆去。

其實我還好

25/01/2014 01:45

「嗨！」Catherine拿著水杯突然在後方出現，
把正沉寂在失落中的我嚇驚：「呃！！」
她一邊用紙巾抹乾手上的水杯，
一邊笑著說：「又要人約，又要人等！」
我連忙道歉，她得戚地笑起來說我只會道歉。

對，我有一種把她看待成主人的奴性，
做對了事會希望她稱讚，做錯了就只會道歉。
最怕的，就是下一秒被她遺棄。
Wilson說要買她一頭小狗，其實她早已有一頭，那就是我。
分別是我會說話、而Wilson又不知道。
但我並未為此感不悅，因為下班後主人又帶我去公園散步，汪！

形容人成為狗太心酸了

暴力小企鵝

25/01/2014 01:47

可唔可以將維園擴建到成個香港島咁大 :~(

林俊傑

25/01/2014 01:48

「聽日…會去邊？」
「無呀。」
「Wilson…後日返喎……」
「可唔可以暫時唔好提佢？」
「呃…Sorry……」
「你呢？」
「我…無呀……」
「我想去科學園食飯…」
「好呀……」

「你而家…係咪無揸車？」
「要見客就會揸……」
「咁你晚晚行過嚟再行返過去攞車返屋企？」
「有時直接放喺公司，第二朝搭車返工……」
「我係咪阻到你……」
「點會…我每日最期待就係…同妳行公園……」
「嘻…」
「每日都驚妳唔得閒…」
「其實真係唔係咁得閒㗎……」
「唔……」
「但係我都鍾意同你散步…」
「哈…」

「因為你畀到戀愛感覺我……」
「戀愛感覺？之前無咩？」
「唔…」
「唔……」
「其實…其實我本身屋邨出身。」
「我都係！」
「係嗰種可以申請車船津貼同全資助嘅程度……」
「咁我一定唔夠妳嚟……」
「唔…你明我想講咩？」
「明。」
「唔……」

林俊傑

25/01/2014 01:49

「所以拍咗唔夠一年拖就嫁…？」
「唔……」
「之後生活得到改善？」
「咁當然啦……」
「咁都唔係唔好吖？」
「但係我並唔係你想象中咁好。」
「呢樣唔可以介定一個人好唔好…」
「我為咗更好嘅生活，專登令佢留意我…」
「妳咁出眾，就算唔刻意，正常男人都一定會留意到妳！」
「我拍過三次拖，佢係我第四個。」
「感情嘅嘢人夾人嘛，咁最後都開花結果吖……」

「我曾經為第二個男朋友大過肚，落咗之後佢就唔要我。」
「唔……」
「第一同第三個都係有外遇而分手。」
「男人大部分都抵唔住誘惑嘛……」
「我知我有問題。」
「分手唔一定係單方面問題㗎嘛！」
「我唔夠好。」
「無嘢係最好，最重要係適合嘛……」

「其實我知自己唔適合佢。」
「點…點解咁講？」
「我Suppose唔應該出現喺佢生命入面。」
「點…點解咁講？」
「其實我至係個第三者，係我橫刀奪愛。」
「咁佢最後都揀咗妳嘛…證明佢最愛嘅係妳…」
「因為我大咗肚，佢只係想負返男人嘅責任。」
「咁…之後……呢？」
「之後我小產。」
「點解…」
「唔…」
「唔……」

林俊傑

25/01/2014 01:49

「我哋之間，係建基於一種責任多過愛……」
「咁一齊生活都會慢慢培養到感情嘛…」
「我其實對佢無好深嘅感情，佢亦唔係得我一個。」
「吓……」
「我哋只係好努力咁扮緊一對模範夫妻。」
「點會呢？我睇得出Wilson好錫妳！」
「佢要做一個完美嘅人，所以佢對邊個都咁好。」
「妳呢？妳都應該鍾意佢嘛，唔係點瞓埋同一張床？」
「啱啱結婚嗰半年係開心，因為好新鮮，大家都會為咗驚喜而驚喜…」
「但之後發現愈嚟愈刻意？」
「唔…而且我發現自己其實唔太Care佢…」
「例如？」
「例如明知佢出去玩，我都無感覺。」

我已不知道立場應該在哪…
一方面想安慰她，試圖用說話修補她對婚姻的缺口，
但另一方面我是為情敵講好說話，
但又心知肚明她另一半在她背後做著的事，內心掙扎矛盾得很。
這晚她對我十分坦白，也許是想考驗我對她的決心，
又或是她真的信任我。

暴力小企鵝

25/01/2014 01:52

加速F5