我沒有再問甚麼，但霎時間要找個地方躲也不是那麼容易，
「你同小明訓練緊咩呀，跑到咁激烈嘅？」經過我家時，大波榮大聲問，
「有人追緊我同隻狗呀！有冇地方避一避？」我連忙問，
「追？」大波榮眉毛上揚，「入我屋企，等我嚟。」
說完他示意我們進去，然後開始打電話，
我和小明氣喘呼呼趴在窗旁邊偷看，兩架黑色車駛進來停在路邊，
幾個男人下車，樣子看起來相當不善，
「喂，你地咩事？」大波榮向他們走去，
不知為何，我的心跳得很厲害，
「你好，我地嚟搵人，同埋狗。」其中一個說，接著把一張傳單給了他，
「哦，你地就係前排走入嚟周圍敲門嗰班人？」大波榮仔細看傳單，
「係，我見啲傳單俾人撕哂，想睇下你地有冇消息，點知就見到有個人帶住我隻狗係度跑。」說話的男人穿著襯衣，但仍看得出他壯碩非常，
「係咩？我見唔到嘅？咁大排場搵隻狗，隻狗好值錢架？」大波榮輕佻地說，
那男人背後幾個大漢皺起眉頭，好像隨時準備發難，
「我見隻狗跑咗入呢邊，介唔仲意我同啲兄弟入去睇下？」男人言語上客氣，但很明顯不準備接受任何拒絕，
「嘿，」大波榮嘴角一揚，「我介意。」
男人聽畢臉上露出微笑，身後的大漢也圍了過來，
「Don’t make me do this in the hard way.」男人發出最後警告，
「吓？東乜撚？我呢啲粗人淨係識聽廣東話同埋潮州話。」大波榮向前踏一步，然後深吸一口氣，「你地話係咪呀？」
「係！」兩旁一陣吼聲，
二十幾個村內男丁走了出來，個個拿著鐵通木棍，一副隨時可開打的架勢。
「嘩，你呢度咩村嚟架？！成班撒亞人戰鬥民族咁款！」小明驚嘆，
「你作為一隻狗，可唔可以唔好連龍珠都識咁離譜呢？」我說，
外面的村民們喧鬧聲四起，搞得那男人臉上一陣尷尬，
圍村遇事一般不會報警，如果有不懂事的小賊、古惑仔進內搞事，能夠保住命出來已算大幸吧，
面對潮州怒漢，一眾大漢也不敢聲張，帶頭的男人只好示意離開，
「BU你呀麼，躝啦！」大波榮啐了一口，他的洛威拿也在旁兇狠地吠叫，
「暫時無事，但佢地一定會再返嚟。」小明沉聲說，
我向大波榮等人連聲道謝，那群大叔只招招手表示沒事，
「得啦，下次你請飲茶啦！」大波榮瀟灑地說，
他連對方底細都不摸就幫我出頭，甚至不問小明到底是不是別人的狗，
第一次，我覺得衣著MK的大波榮是如此有型。
回到家，小明不斷來回踱步，似是心事重重，
「究竟係乜嘢事，你而家講得未呀？」我忍不住問，
「我唔想將你捲入嚟，唉，不過佢地好可能已經鎖定你。」小明好像很苦惱，
「佢地？你主人呢？頭先嗰啲又係咩人？」我一點都聽不明白小明的話，
小明抬起頭，尖尖的嘴巴長長地呼了一口氣，
「對唔住，之前我一直呃緊你。」小明眼睛緊緊地盯著我，「我唔止係識講嘢咁簡單。」
![[banghead]](/faces/banghead.gif)
