由於大腦承受唔到過量既痛楚，斷手後我短暫地失去意識。「3、2、1，完成！」「新產品？」「打算點做？」矇朧間我聽到從空曠處傳黎既交談聲，眼前更慢慢咁出現影像，我估計係無意中闖入左野生Bella既記憶碎片。我見到一大班身穿白袍既研究人員圍住一個Keyboard，似乎討論緊啲重要既事情。我仔細望清楚，為首既教授胸前有塊名牌，隱約見到寫住林早信，身邊既研究人員都叫佢做方丈。
其中一個研究人員發問：「方丈，你憑咩覺得F5 Keyboard未來會暢銷？需求真係有咁大？」方丈用肯定既語氣回答：「一啲都唔大。」「咁點解要花咁多錢研發？」方丈呷一口茶，慢條斯理咁講：「所謂英雄造時勢，目前我地集團控制世界最大型既討論區高登，只要我地大量聘請員工，發放標題吸引既圖片、AV Post，但裡面唔放Seed，自然有無數既用家不停咁㩒F5直至潰爛，需求就會幾何級咁遞增。」「咁最多都係擴大需求，咁你諗住點推銷？」「潮文。只要我發出一篇佛誕買Keyboard既潮文喺區內瘋傳，網民就會因為名牌效應而盲目追捧，到時我地舖天蓋地咁宣傳，好輕易就會見到成績。」
影像一轉見到方丈愛不釋手地擦拭當時尚係Keyboard既野生Bella，無幾耐，一個妒忌方丈既研究人員喺
Keyboard上面做左手腳。
影像再轉，喺公布Keyboard產品過程裡面，測試期間野生Bella出現短路，自此被失意既方丈唾棄。喺佢被棄置既時候，身上既零件經常被無理拆除，傷口越黎越多。
影像又轉到野生Bella孤獨地與次貨為伴既房間，內裡有過百部閉路電視運作，原來所有出產既F5 Keyboard都被安裝左小型鏡頭，會喺不知不覺間將畫面傳黎呢到作中央監視。換言之我既行蹤一直都被暴露，難怪其他勇士咁容易搵到我，大概有某個人喺背後透露我既消息，借我既能力收集勇士の蛋。
當時野生Bella就係通過閉路電視專注咁見證我既遭遇，而我既生活成為左佢既唯一娛樂。我感受到佢充滿渴望既內心世界，佢好想得到我既呵護，於是自動變做Bella出現喺我身邊。
接住落黎我見到佢點樣逃走失敗，被工程人員囚禁；見到佢被強行加上化學劑，外殼日漸腐爛；見到佢任由正品既嘲笑，卻拼死維護果套輕裝甲既程式，為既就係同我講一句：「我識換裝...應該可以幫到你。」；見到我同佢喺麵包舖裡面掂同一個麵包超人；最後我見到佢最大既心願，佢希望我可以同佢講一句：「我會保護你。」
![[sosad]](/faces/sosad.gif)
