蠍子被擊倒後傷口噴出濃厚既白色液體，由於距離太近，我不幸被濺中，呢啲液體睇黎會限制活動能力。與此同時，前方既沙丘慢慢積聚，堆砌左一個火紅色裝甲既勇士，今次呢個勇士既外形比以往既更為強悍，眼神充滿霸氣，似乎係個厲害既角色。火紅勇士逐步走近，佢既姿態步大力雄，每行一步沙地上都留低重重既腳印。
佢滿臉不屑咁打量我套裝甲：「嘖，用垃圾你唔覺得羞恥咩？」雖然我郁唔到，但聽到佢侮辱野生Bella，我一啖口水吐埋去：「呸！男人老狗成身紅色，著到成個Hello Kitty咁，你唔覺得羞恥咩？」我感到驚訝既係佢絲毫無動怒，只係施施然咁抺去臉上既口水：「啊，最後既掙扎，真係可憐。」面對佢冷靜既反應，我反而覺得心寒，呢個人城府太深。
我準備好受死，平靜咁問野生Bella：「你怕唔怕？」佢笑說：「唔怕。」簡簡單單一句，我地都知道死對我地黎講無乜大不了。火紅勇士召喚太刀，從上而下咁劃過，落點卻刻意傾側，只削去裝甲既一小部份。「啊！！！」野生Bella發出椎心刺骨既嚎叫，其實裝甲等於身體，即使係Keyboard本身亦會有劇痛既感覺。火紅勇士逐少逐少地削走野生Bella既外甲，對男人而言咁係一種極大既恥辱，就好似女朋友既衣服喺自己面前一件一件咁俾禽獸除，但係就咩都做唔到。
聽到野生Bella叫到力竭聲嘶，我痛恨自己既無能，回想佢一生所受既傷害，只差一步就會得到幸福，就係呢一少步俾無情既人摧毀左。人恨到極限就會不惜一切咁反擊，我冒住超負荷既危險強行發動裝甲所有既動能，身上既電流噼啪作響，似乎快要掙脫白色液體既束縛。為左阻止我，呢個時候火紅勇士輕描淡寫咁揮舞太刀，竟然將我兩條臂膀整齊咁切下。望住地上兩隻手，我已經唔知咩叫痛，只知道咩叫絕望，睇黎今次我徹底被打敗。
![[sosad]](/faces/sosad.gif)
![[yipes]](/faces/yipes.gif)
![[bomb]](/faces/bomb.gif)
好緊張