阿栽吩咐完人之後，就行左埋我度
「正哥，我已經打左比阿勇，佢話會黎接你，咁不如你坐一陣先？」
我：「好。」
我話好既原因，係見到頭先阿栽果個咁型既情景，我真係對佢而家做緊既工作有小小興趣，同時間，我亦都發現我隻手依然係濕濕地，唔係好止到血。
阿栽同我講完野之後就行番出張長枱度，逐個逐個人咁行埋佢地旁邊
「阿榮你仲差五十幾張單先夠獎金呀，仲有幾多日呀而家，有位同我做夠佢，唔係下個月食屎呀你？」
「Sam仔，你條撚樣冇倉做乜唔走呀？乜話睇圖表？去睇下邊個天橋底好訓好過啦，仆你個街再開唔到倉你街都有得訓呀睇圖表，收工番屋企抖足精神聽朝番黎啦。」
「Kelly姐，妳就威啦，個客今朝入左五十萬落戶口，做得野未呀而家？戶口行得就渣番十手開下飯先啦。」
「志仔你渣左貨未？乜話沽左？我咪叫撚左你等我番黎先做野囉，你個客個濕尻戶口得番兩皮幾野架咋，你仲學人沽貨，一陣開市個金價衝上去摸摸個高位你個倉就爆得架喇天才，而家差幾多呀？唔輸得多就搵位轉身啦。」
我見住阿栽好似一個媽媽生咁，行過每一個人身邊佢都係咁熟悉，知道佢地現況，佢地做緊乜野，佢地應該黎緊做乜野，而每一個人對佢都係唯命是從，直情係一句咀都唔敢駁。果一刻，我諗起我平時對住堆電器既刻板工作，我諗起呢份我做左幾年既自豪工作，我竟然有小小自卑。
我諗起以娜既說話。
但呢一刻我依然係嬲緊以娜對我既背叛行為，儘管佢對我講左堆我反駁唔到佢既問題，不過我始終認為佢係一個貪錢既女人。
我諗得佢愈仆街，我就愈唔覺得自己自卑。
感覺良好。
半個鐘後，可勇黎到接我，由於我隻手仲未算止到血既關係，可勇堅持要同我去醫院，我都冇拒絕，因為我見到咁多血，都有小小淆底。
臨走前，我見到阿栽同果個好似著西裝扮大人既細路一齊行
「喇阿倫，栽哥係咪冇點你呀，頭先你五毫子邊果個位渣幾手，而家幫客嬴到錢時你自己又夠單，今個月你夠百五張架喇，下個月咪出番三皮野同條女去玩下先囉。」
「知道，唔該哂栽哥！」
三皮？呢條細路毛都未出齊，點解可以坐喺度打下電話渣下沽下就搵到三皮？
行左入電梯，我依然諗緊呢個問題，電梯門閂緊果時，我望到呢個阿倫好開心既樣，我好想知，好想知呢個倫敦金既世界，
到底係一回乜野事？
![[sosad]](/faces/sosad.gif)
