基於原文樓主膠心密友成星期無上過水
所以小弟決定試下接篇文寫落去

亦由於原post樓主潛水攪到人流流失左唔少關係
所以試下開新post睇下搵唔搵得返d人流

如果見情況無改善我都應該唔會再接落去 (如果無人睇都無謂勉強)
希望各位多多支持

原文link:
http://forum4.hkgolden.com/view.aspx?message=3327760&page=15

下為原樓主最後一篇文
====================================================

我好肯定咁搖頭,
直到呢一刻, 無錯我係好享受變左做女仔之後被注目既感覺
亦唔可以否認變左做女仔之後被撫摸身體上面帶黎同男仔唔同既刺激感
但我好肯定自己既心態一定仲係一個男既
叫我同一個男人談情說愛, 我腦入面只會有gay既感覺!!!

「你肯定你真係咁樣...?」
腦入面奇怪既聲音又響起,
我覺得好可怕...我...真係係心入面有否定自己係男人既一部份...?

「誰又愛我這種孤...」
手機一響起, 我就不加思索咁接起
因為我實在唔敢再繼續諗呢件事

「表哥, 醒左啦?」原來係表妹

「嗯...」見表妹無提琴晚既事, 我難得咁聰明一次無去掀起呢個瘡疤

「咁好啦, 你依家出黎, 我地去食早餐先, 唉, 食完仲好多野搞...好煩呀」

「我...今日唔得閒呀...」我下意識咁回道

「咩話? 唔得閒? 你有咩做? 唔好話你變左女人啦, 你未變之前都一個frd都無!!」

平時既我聽到表妹咁講話唔定會發火, 但今日我只有無限心虛, 我半真半假對表妹講:
「我...我無錢啦, 去搵兼職呀...」

表妹聽到之後脾氣更大, 好嬲咁同我講:
「搵兼職? 搵咩兼職呀? 去邊搵呀? 好呀, 我同你一齊去囉!」

「唔洗啦, 我自己搵到既, 聽日搵你, 係咁先, 掰掰」
聽到表妹質問既語氣, 又諗起阿kay既叮囑, 我就更加心虛
但係我心入面明明唔想去做咩出租女友...點解我唔同表妹坦坦白白咁講清楚呢...?
我不停係呢個問題上面迴圈, 思緒好混亂...

「叮噹」 過左唔知幾耐, 突然響起門聲, 我打開一睇, 原來係阿kay

「哈表姐你仲話唔想去, 衫都換埋啦, 好, 行啦」

「嗯...咁去邊呀...」
望住阿kay熱情既表情, 又諗起留係屋企表妹唔知會唔會殺上黎,
我決定跟阿kay出去睇下,
如果唔對路,
我, 即走!

「嘻嘻, 落去你就知」 阿kay對我神秘一笑, 輕輕咁拉住我隻手, 離開我屋企

====================================================

騎劫start:

「阿kay…真係無問題嫁可?」

「放心啦, 表姐, 我同佢係老麥傾過一陣先上黎搵你既, 呢條仔保證人畜無害呀!」 阿kay好有信心咁講

「嗯…」希望啦

「話哂都係表姐第一次喎, 更係由淺入深慢慢黎啦~嘿」阿kay好似小惡魔咁笑笑口

「吓? 第一次? 由淺入深?... 你講到咁曖昧既…」我感到兩頰有d溫熱

「哈哈…講笑咋講笑咋, 表姐你真係好可愛呀, 咁樣講下就面紅」

「我無呀…我…」

「表姐妳咁純情, 你地兩個一定好夾姐!」

落到老麥, 阿kay話個男仔唔係到, 之後拎起部iphone4 打比佢…

「喂喂, Kevin, 我地到左啦, 你係邊? 哦…咁快d啦…靚女唔鍾意等人嫁…哈哈」

「佢話去左洗手間, 叫我地等一陣喎…」

無聊既等待時間, 我開始想像約我地呢條友到底係乜樣, 矮, 肥, 定毒到爆瘡…
不過俾得錢約女仔出街, 肯定係現實世界溝唔到女既人,
唉, 比著係我過多幾年搵到工有錢…都應該會咁做…我認我毒…溝唔到女…

咦? 唔係喎, 而家我係女仔…仲要係人見人愛既索女…
諗起原本個身體將來會咁淒慘…而家咁樣可能真係無壞…

「hel, hello, 唔…唔好意思啊, kay, 岩岩人有三急…」就係我思考更個陣, 一把男聲出現, 我抬起頭…

唔係掛?

(咁靚仔做乜要比錢搵出租女朋友?)

呢個係我見到條仔之後, 第一個想法.

唔係矮仔, 唔係肥仔, 亦都唔係毒撚, 眼前呢個男仔, 身高起馬有180,
睇身材亦都知道平時有操開, 至於個樣? 我估佢單下眼應該電死唔少女

當然! 電唔死我…因為我係男仔…好似係…

我都估到自己一面難以置信既樣望住條仔係好失禮既事
但呢件事實在係非常離譜
如果我係佢…我係佢既話…一早已經可以閱女無數…

但估唔到既係, Kevin 都難以置信咁望住我
一面 (呢條女靚成咁竟然只係收千二蚊? 唔撚係掛) 既樣. 真係出哂面.
Kay見到呢個咁奇怪既情況, 好明顯咁用手肘頂左kevin一下, 佢即刻驚醒左

「嗱…呢個係怕羞仔 Kevin」kay指住kevin 「佢真係好怕羞嫁…一陣表姐妳就知…」

Kevin 一面唔服咁望著kay, 好明顯係講中左佢既要害

「呢個係出街唔著 bra既表姐家蔚…啊…對唔住啊…口快快講錯野tim…嘻嘻…」

…

…

妳故意既。

Kevin一聽完即刻嚇到連望都唔敢望著我…

「我有著嫁…我今日有著嫁!!望住我啦…」我急望解釋

「哈…今日有著…表姐妳又面紅啦…」

可惡…kay你係魔鬼…

「…妳…妳好啊… 」kevin好緊張咁講…都係唔敢望著我…真係非常怕羞

「吓…你好…嗯…可以叫我家蔚…」我都好緊張,

平時同男仔傾計都唔會口疾疾, 最衰都係kay, 攪到場面更加尷尬

「家蔚啊…個名好好聽啊…保家衛國…哈…哈…啊…」kevin 好自然咁攪左個gag

…

…

好爛…

「好爛啊…」一輪沉默之後, kay終於開口打破呢個局面

「嗯…」真係好爛…

「咁我地而家去邊呀? Kevin, 唔係要我地兩姐妹諗丫嘛? 表姐可~」

一講完, kay 突然攬住我, 用可愛到爆既眼神望完kevin再轉去望我…
軟綿綿的胸部同我既胸部緊緊貼住一齊…
如果我仲係男仔, 一定扯足成日…

「去…去唱k好無…」kevin 結結巴巴咁講…

「哈! 都估到嫁啦…都好…我都好耐無唱過k啦, 帶路啦…」

Kay鬆開攬緊我既雙手, 再將左手勾著我隻右手, 打算同我並肩一齊行

「我地行囉表姐…」

我既胸前仲有kay既餘溫, 同淡淡既香水味
短暫既美好時光有d令我有少少迷糊…

「表姐你平時聽開乜野歌多?」阿kay又用甜到殺人既眼神望著我

「下…外國歌…純音樂…」

無錯, 雖然我係一個毒撚, 平時都有睇下動畫打下機
但其實都好少留意日文歌, 國語歌都勉強有聽過, 廣東歌? 算吧啦
對我黎講, 外國歌更加能打動我既心靈,
純音樂可以令我更容易沉醉係我既幻想空間…

「表姐果然成熟好多呀…聽既歌都唔同d」聽得出kay今次唔係潤我

「都唔係既…」

「咁…唱k會唔會唔岩表姐妳呀?」kay有d唔好意思咁問

「唔…唔會既…當體驗下囉…」

事實就係我一次都無去唱過k, 聽歌異類只係其中一個藉口,
真相係我無自信係一大班人面前唱歌.

「都係既, 嘻嘻, 或者表姐你去完會愛上呢~」

為左就我, kay 同 Kevin 決定行遠少少,
去一間多d外語歌選擇既k場唱, 攪到我有d唔好意思.
Kevin淨係討論轉場地個陣同kay傾左陣, 之後全程無出過聲, 睇黎佢真係好怕羞
完全明白到點解佢要比錢約女, 真係浪費左個樣. 認真天無眼.

都好既, 至少學阿kay話齋, 呢條仔真係人畜無害.

雖然佢地為左我轉左場, 但去到k房我都係齋坐.
Kevin 都係, 咪都唔敢掂坐係到, 只係拎住杯凍檸茶默默飲。

結論就係kay一個人係到solo, 唱埋d首首旋律同mv都差唔多既廣東話歌

「乜而家香港音樂攪成咁…」我嘆氣, 真係無得救。

kay把聲都幾唔錯, 但都救唔返幾多, 真係越聽越悶,
我差唔多半首歌就拎起部電話睇下夠鐘未

「表姐, 唱下啦, 我好攰啦。」睇kay個樣真係好攰, 差在未斷氣

好啦, 咁我就求其係外語熱唱榜點首 numb 唱下, 平時雖然成日係屋企鳩唱,
但都未試過真係拎起枝咪

「表姐表姐呢首我都識啊, 但男人歌黎嫁喎, 不如唱呢首啦。」 kay指住首Love story 想我唱

呢首我都識, 但係…

「…女人歌…我男人老狗點唱啊…」咪住, 我而家係女人…

「表姐妳講咩話?」好彩k房太嘈佢聽唔到

「無野, 好啦, 就試下呢首…」

聽住前奏音樂, 我拎起枝咪, 手震腳震得好利害, 好彩k房暗佢地無留意到,
估唔到我k房既處女歌就係唱女人歌…

冷靜, 你得既, 唔好入錯位, 你得既…

「We were both young when I first saw you i close my eyes .... 啊?」

又甜又清, 比起電視個d乜乜巨星有過之而無不及
呢個真係我把聲?

-----------------------------------------------------------------------------------------
雖然應該大部份人都聽過, 不過都放條link出黎比個參考大家

Numb
http://www.youtube.com/watch?v=kXYiU_JCYtU&ob=av3e

Love story
http://www.youtube.com/watch?v=8xg3vE8Ie_E&ob=av2n

「表姐妳唱得好好聽呀!」一聽完, kay即刻拍哂手

「係…係呀…家…家蔚妳真係唱得好好…」kevin唔係講左句野我真係以為佢消失左

「哈哈…過獎過獎…」比佢地咁讚一讚自信真係返哂黎

係kay既提議下 (Kevin都有間中插下嘴) 又唱左唔少歌 (都係女人歌)
我一路唱一路感到自己光茫四射, 呢個唔係幻想, 係現實…

之後又唱返唔少自己鍾意既男歌, 估唔到用咁甜既女聲去cover又有另一翻感覺
係我帶動下, Kevin都開始拎起枝咪唱, 雖然唱得好麻麻,
但明顯成個氣氛同一開始阿kay係到solo好唔同,

估唔到kevin都識唔少外語歌, 所以同佢合唱左幾首歌,
kay一路笑笑口係到話kevin唱得差影衰哂我。

時間過得好快, 話咁快就夠鐘
估唔到唱k咁好玩, 埋單既時候仲係到猶豫更應該唔應該加鐘
不過我同kay已經唱到把聲沙哂, 所以都係決定下次再黎過。

「幾錢話?」我問kay

「表姐咪玩啦, 更係kevin比啦!」

女仔就係有呢d著數, 越黎越覺得做女仔真係唔錯…

「嗯, 當…當然…」一講完, Kevin就係褲袋拎起個Louis銀包, 再隨手抽一張金卡

「刷…刷刷卡啊唔該。」口疾疾咁同侍應講

有錢仔, 又靚仔, 係衰怕羞, 又唔識講野, 真係可惜,
比咁多錢出黎 最後只係好似同普通朋友咁出街真係好失敗。

「之後去邊?」阿kay問kevin

「我book左間法…法國餐廳…而…而家去差唔多…」

原來仲有後著, 法國餐廳, 一王兩后
呢條仔都蠢唔哂…

因為距離法國餐廳都有一段路,
所以我同阿kay決定去一去洗手間先

一入洗手間, 阿kay就捉住我雙手

「表姐…」阿kay面帶歉意, 好似有野想同我講

「咩…咩事?」呢個小魔鬼會出現呢種表情, 令到我都有d擔心

「其實呢, 一陣有野要妳幫下手。」阿kay有d面紅咁講

「下…幫乜?」

「點講呢, Kevin話想比多少少錢…」

「唔得!」kay未講完我已經反射性回答,
出租女友, 估到無咁簡單, 果然最終目標都係我既身體…
雖然做女仔有好多好處, 但我心靈仲係男, 呢種行為始終都係接受唔到

「妳聽埋我講先啦~~唔係好似表姐妳咁諗嫁~」

「咁係點呢?」

「我估妳都知kevin係有錢仔啦…」從佢既衣著同岩岩係咁暗既k房都閃到殘眼既金卡, 睇得出。

「咁上流人士一定會接觸唔少差唔多既人,
而kevin既朋友, 點講呢, 大部份都有女…
妳知啦…以kevin咁既性格, 邊可能溝到女喎…」

「咁我大致都知妳想點, 咁佢點解唔搵妳呢?」

「佢話我個樣太細個, 唔夠成熟喎, 真係可惡!」阿kay好嬲咁講

嗯, 阿kay 真係幾靚女, 不過始終都係o靚妹feel,
我就唔同, 雖然只係大阿kay兩三歲, 但無論樣同身材都成熟過佢好多。

「只要食餐飯就多三千蚊嫁啦, 認真考慮下呀, 表姐!」

「都得既, 如果可以賺多少少既話, 咩話, 三…三千蚊?」

平時要打成星期既工, 食一餐就拎到, 仲要係食法國餐。

「放心啦表姐, 我會從旁協助妳嫁! 唔會比kevin亂黎! 嘿嘿...」阿kay又回復小惡魔feel, 咁樣我反而仲唔放心

「好…好啦…但我呢身衣著…女裝T-skirt 短褲, 上唔到台面喎…」為左三千蚊我決定豁出去。

「呢層表姐妳唔洗擔心, 妳估我今日帶咁大個袋無原因咩, 哈哈」阿kay拍一拍佢個好脹既手袋。

原來一早準備好哂, 係最後一刻先話比我知…

「表姐等我幫你換啦, 呢件野要自己換應該幾難」之後就推左我入廁格

一男一女共處係細到爆既廁格入面…唔係…我係女…我而家係女…

「嘻…表姐妳一定會話件野靚…」阿kay係袋入面拎起左件紫色禮服…

而且…

「咁…咁低胸既?」一路著一路覺得唔對路

「表姐妳唔可以浪費妳咁出色既胸部, 你唔係王樂宜啊!」咁都要抽一抽表妹水...

「嗯…kay…好緊啊…」阿kay綁緊我條腰, 令到個胸部異常地緊

「係要緊d嫁啦表姐…唔係好易走光嫁…妳都唔想比其他男仔睇蝕嫁嘛…攪掂…
哇表姐妳真係好靚啊…快d出去睇下」阿kay滿意咁打量完我一翻之後打開廁所門

望著塊鏡, 美呢個字係而家既我面前係如此地膚淺…

「我…我…」呢個真係我?

一身低胸到爆既紫色晚禮服, 裙底到室頭哥上少少, 露出雪白既小腿
一雙玉兔係背脊綁緊既情況下顯得更為豐滿…
總之, 就係應該挺既地方挺, 應該瘦既地方瘦,
完全係為我量身打造, 點解阿kay會咁清楚我既身材?

「嘻, 我眼光果然唔錯呢! Kevin有個家姐係賣禮服,
所以好容易就借到件, 估唔到咁岩身! 表姐妳唔做model真係浪費哂, 之後…」

阿kay再係個袋到拎起對高跟鞋

「著埋呢個就攪掂。」

「咪住, 高跟鞋? 我著唔到嫁…」拖鞋就著得多姐, 高跟鞋…

「吓…?表姐妳無著過? 咁就有d難攪…點都要試下嫁啦…」
一講完就抬起我左腳將高跟鞋套入去, 之後到右腳…

「試下企唔企到?」阿kay笑笑口咁講

原本自己都唔算矮, 但而家明顯高左好多
但高處不勝寒, 感覺就好似比強風吹住一樣, 搖搖晃晃。

「呀!」終於企唔穩, 好彩阿kay扶一扶…

「表姐, 捉著我隻手啦, 點都要習慣下, 嘻嘻。」由緊張變成食花生咁, 阿kay妳真係好s啊…

就係咁我就靠kay扶住拐下拐下好似拋柴咁行出洗手間…

Kevin一望到我, 就好似岩岩係老麥第一次見到我咁呆左企係到

佢個舉動令到我醒覺到, 雖然我而家真係好靚, 但衣著係非常之性感同暴露
我反射性將無比kay扶著既左手放係胸前, 遮得就遮。

「啊, 表姐妳等陣…」阿kay見到我個反應, 就即刻係袋到拎左件外套出黎, 之後笠係我身上。

「哈…妳個袋都裝都幾多野嫁喎…唔該哂…」

「唔洗, 嘻嘻, 話左我會協助表姐妳嫁嘛!」

阿kay雖然比人感覺係活潑小惡魔型, 但都幾識觀人於微, 又識睇場合做人…

相反…

「啊…家…蔚妳真係好靚…」Kevin又面紅又口疾疾咁講

唉…呢條仔就真係無Q用…

我地決定坐的士去目的地, 當然又係kevin出錢,
真係令我鬆一口氣, 如果無kay扶著我, 我相信我一步都行唔到

雖然我一身晚裝只可以用完美黎形容, 但我打死都唔會再著一次,
綁更既腰部令我呼吸困難, 裙更加唔洗講, 臀部一直都處於空虛既情況
真係好無安全感, 至於高跟鞋, 我估聽日起身雙腳應該會腫到行唔到…

實在好佩服女士們, 果然, 短衫短褲踢拖先係男人既浪漫。
我暗暗發誓, 拎到呢筆錢之後一定要係屋企休息返幾日。

其實計劃就好簡單, 就係同kevin食餐飯, 唔需要做其他野
如果有有朋友黎搵kevin吹水, 只要扮好女朋友個角色求其應兩嘴就得,
其他kevin 會攪掂, 雖然我心入面覺得最大敗筆就係kevin到底識唔識做戲...
至於kay? 就扮係我妹妹一齊食飯....

五十幾蚊既車程, 坐前排既kevin拎左張金牛想找結果比司機怒啤,
我見到阿kay係後面偷笑。

係kay扶完我落車之後, 我望一望間法國餐廳,
感覺就係食一餐就會用左我一年零用錢,
唉, 同人唔同命就係咁。

「Bienvenue.」

門口侍應仲要用類似法文既野開口, 睇黎我真係乜野都唔洗做, 齋食就得
就係呢個時候, 隔離阿kay部iphone響起

「喂喂? 紫詠? 係係…」只見kay面色一沉 「咁妳等我一陣…」收左線

「表姐…」阿kay用一個”好對唔住”既眼神望著我…

唔方好野。

「睇黎…哈..哈哈…呢餐要靠你地兩個。」最後個句細聲到差d聽唔到。

「下下…唔好玩啦…」我用一個”無妳我唔做”既眼神望返住阿kay.

「表姐妳得既, 我真係十萬火急要走啊, 好對唔住!」之後就另轉身急急腳走

喂喂! 無妳我企都企唔穩呀…
隔離既kevin見到情況, 終於紳士返一次, 舉起隻手打算扶我

見到呢個情況, 我而家係天人交戰
扶, 就要面對呢個極尷尬既情況, 兩個男gay到爆

扶, 就要面對呢個極尷尬既情況, 兩個男gay到爆既法國餐廳之夜
唔扶, 就一步都行唔到, 分分鐘要企到聽朝。

阿kay, 妳好野, 今次明玩我…

鈴鈴, 電話訊息。

「對唔住丫表姐, 最多三千蚊比妳袋哂啦 ;) 」

我寧願比三千蚊妳返黎好過。

==================

今日咁多先 睇情況再出

幾時同Kay去游水

,

lm

lm

lm

你騎劫之後 主角會接受自己已經係女仔 定係 仍然毒撚心態?

毒撚

SOSAD 難得真係騎劫左 我唔想同 "女神交換身體" "點解變左做索女甘" 撞

期待出文

支持

lm 加油

計續啦