【常公子近代史】 19 - 香港高登
[登入]
極端的年代
引用
13/08/2022 12:32
重溫舊貼

#good# 【常威考証】大清亡國關我老母蛋牛治
https://m.hkgolden.com/view.aspx?message=6835958&page=1

#good# 【常威中史】大清亡國關我老母蛋牛治2
https://m.hkgolden.com/view.aspx?message=6885326&page=1

#good# 【常威中史】大清亡國關慈禧蛋牛治 3
https://m.hkgolden.com/view.aspx?message=6928986&page=1

#good# 【常威中史】大清亡國關我老母蛋牛治 4
https://m.hkgolden.com/view.aspx?message=6970625&page=1

#good# 【常公子近代史】大清亡國關我老母蛋牛治 5
https://m.hkgolden.com/view.aspx?message=7007456&page=1

#good# 【常公子近代史】大清亡國關慈禧蛋牛治 6
https://m.hkgolden.com/view.aspx?message=7044235&page=1

#good# 【常公子近代史】大清亡國關慈禧蛋牛治 7
https://forum.hkgolden.com/thread/7085861/page/1

#good# 【常公子近代史】 8
https://forum.hkgolden.com/thread/7134248/page/1

#good# 【常公子近代史】 9
https://forum.hkgolden.com/thread/7173701/page/1

#good# 【常公子近代史】 10
https://forum.hkgolden.com/thread/7224663/page/1

#good# 【常公子近代史】 11
https://forum.hkgolden.com/thread/7274558/page/1

#good#【常公子近代史】 12
https://forum.hkgolden.com/thread/7321775/page/1

#good#【常公子近代史】 13
https://forum.hkgolden.com/thread/7363743/page/1

#good#【常公子近代史】 14
https://forum.hkgolden.com/thread/7405816/page/1

#good#【常公子近代史】 15
https://forum.hkgolden.com/thread/7447118/page/1

#good#【常公子近代史】 16
https://forum.hkgolden.com/thread/7485281/page/1

#good#【常公子近代史】 17
https://forum.hkgolden.com/thread/7522236/page/1

#good#【常公子近代史】 18
https://forum.hkgolden.com/thread/7561917/page/1

https://upload.hkgolden.media/comment/vwwhbejy.n3wbkhcpb1z.pkkafdsu2fs.ckh.jpg
極端的年代
引用
13/08/2022 12:34
【常威近代史】第一部《大清亡國關慈禧蛋牛治》
https://play.google.com/store/books/details?id=C3hjDwAAQBAJ

【常威近代史】第二部《中國一百年前第一次開放改革》
https://play.google.com/store/books/details?id=_6KMDwAAQBAJ

【常公子近代史】第三部《#東方維多利亞女王之死》https://play.google.com/store/books/details?id=GaGrDwAAQBAJ

【常威近代史】第四部《霹靂大忠臣對決無敵大買辦》Round One
https://play.google.com/store/books/details?id=Np3PDwAAQBAJ

【常威近代史】第五部《霹靂大忠臣對決無敵大買辦》Round two
https://play.google.com/store/books/details/%E5%B8%B8%E5%A8%81_%E9%9C%B9%E9%9D%82%E5%A4%A7%E5%BF%A0%E8%87%A3%E5%B0%8D%E6%B1%BA%E8%B6%85%E7%B4%9A%E5%A4%A7%E8%B2%B7%E8%BE%A6_ROUND_2?id=puXmDwAAQBAJ

【常威近代史】第六部《最九衰的大軍閥時代》Round 1
https://play.google.com/store/books/details?id=bCMNEAAAQBAJ

【常威近代史】第七部《最九衰的大軍閥時代》Round 2
https://play.google.com/store/books/details?id=lPgaEAAAQBAJ

【常威近代史】第八部《最九衰的大軍閥時代》Round 3
https://play.google.com/store/books/details?id=fY8mEAAAQBAJ

【常威近代史】第九部《孫文之死》
https://play.google.com/store/books/details?id=evMsEAAAQBAJ

【常威近代史】第十部《蔣Sir狼死開拖》
https://play.google.com/store/books/details?id=SgE8EAAAQBAJ
Kindle版
https://www.amazon.com/dp/B09C2FJD3S

【常威近代史】第十一部《人生有幾多個黃金十年》
https://play.google.com/store/books/details?id=NIRKEAAAQBAJ
Kindle版
https://www.amazon.com/dp/B09KH5NWB9

【常威近代史】第十二部《籠裏雞大作反》
https://play.google.com/store/books/details?id=heJ1EAAAQBAJ

https://upload.hkgolden.media/comment/vlgpsbvw.ls4dagd2ygt.x4v5f5euhof.zlk.jpg



*available on android and ios
極端的年代
引用
13/08/2022 12:34
https://upload.hkgolden.media/comment/xo0a33vw.jghwtgxjhpk.xevzbavm0ot.fnp.jpg

【常威近代史】(七百一拾一回)
進入1936年大時代

時間線進入1936年,整個世界正邁向恐怖戰爭嘅邊緣,第二次世界大戰發生在即,但一如1913年一樣,全世界嘅平民百姓都唔能夠相信一次人類史上最殘酷血腥嘅戰爭即將降臨到自己身上,將原來的和平安逸徹底粉碎,依一次世界大戰,徹底改寫咗人類嘅歷史,亦將整個世界帶入一個全新嘅格局,第二次世界大戰結束之後,人類真正步入後工業世界發展嘅黃金時代,戰後嘅一兩三代人,享受住血腥戰爭殘留落嚟嘅補償,直至今日21世紀,事實上我哋身邊嘅每事每物,或整個世界嘅政治經濟基本格局,都係來自二次世界大戰嘅戰果,例如兩種意識形態嘅對立同冷戰,又例如主宰戰後百年嘅美元霸權,一切一切,都係因為第二次世界大戰嘅爆發同終結。

1936年1月1號,國民政府接收牯嶺租借地行政權;上海市市民國貨年運動大會開幕;同日,浙江省奉化縣呂全世發明安全煤油燈頭。今日,新疆王盛世才(1887-1970)與蘇聯簽訂合作協定,意欲同蘇聯建立「軍事同盟」,以保障佢新疆「獨立王國」嘅地位。盛世才咁樣做亦都無可厚非,賣國固然係賣國,但係要保住自己所擁有嘅一切,向邊邊落part,盛世才自然心中有數,睇見其他軍閥向蔣Sir靠攏後嘅收場,明哲保身都是應該的。協議嘅內容包括:1.蘇聯與新疆政府負責繼續維持全省秩序及安定,不使任何外國勢力介入或滲透;2.若新疆遭受外來攻擊,蘇聯即給予政治、經濟和軍事的援助;3.如新疆獨立,蘇聯有義務支持。第一點第二點當鳩噏,第三點就講到明,新疆會獨立,而且好快會獨立,而且會由蘇聯背後撐腰成事。這份盛世財同蘇聯簽訂嘅宣言,其實亦係一份變相嘅新疆獨立宣言。去年1935年5月16號,盛世才已經同蘇聯貿易公司響烏魯木齊簽訂總額為500萬盧布嘅借款合同,年息盛惠4厘,限期5年,以土產作擔保,分期還本。之後大批蘇聯顧問同埋工程人員湧入新疆,遍佈軍事、行政、財經、交通、工程等各項領域,成為實際操縱新疆事務嘅「無形之手」,借錢畀你,就想吞埋你,亦都係正常,鬼叫你窮?個世界其實好公平,只要有錢就大曬,冇水就收皮!
極端的年代
引用
13/08/2022 12:35
1月2號,歐洲開始風起雲湧,意大利法西斯之父墨索里尼(1883-1945)有所動作,入侵非洲阿爾巴尼亞,國民政府宣佈對其實行經濟制裁,至於當時中國同意大利有幾多貿易來往,我真係唔知道,但係應該唔多。同日,29軍一名士兵喺天津大沽搜查走私黨,與販毒之日雙方發生衝突。

1月3號,129學潮嘅餘波仍未終結,為進一步宣傳抗日救國,華北學生聯合會決定組織平津學生南下擴大宣傳團。宣傳團下分4個團,第1、第2團由北京大學、東北大學、師範大學、中國大學等學生組成;第3團由清華大學、燕京大學、輔仁大學、朝陽學院學生組成;第4團由天津大中學校學生組成;總指揮為董毓華、江明及宋黎。1月8號,4個團響固安縣城會合,然後沿平漢線兩側南下,深入河北農村,向農民大眾宣傳抗日救國概念,不久,由於軍警阻撓,宣傳團被迫折返平津。2月1號,由宣傳團1、2團提議建立嘅「中華民族解放先鋒隊」響北平師範大學正式成立,16號,「先鋒隊」發表宣言,提出動員全國武力驅逐日本帝國主義出境,成立各地民眾武裝自衛組織及各界抗日救亡會等8項具體行動綱領。日本人步步進逼,亦唔係一朝一夕嘅事,不過發展到咗1936年,似乎大家都須要攤牌,無謂再拖拖拉拉。講真,日本侵華,由1896年甲午戰爭打輸之後就開始一步一步進行,拖拖拉拉,前後都拖咗接近40年,兩個國家都已經改朝換代,都係時候要搞清楚佢。

1月4號,偽軍佔據察哈爾北部5個縣,29號設立臨時軍政府,繼續分裂。1月5號,日軍槍擊北平朝陽門中國守軍,開始挑釁你。1月5號,著名地質學家,中央研究院總幹事丁文江(1887-1936)因煤氣中毒喺長沙去世,享年49歲。丁文江字在君,江蘇泰興黃橋鎮人,1911年於格拉斯哥大學獲得動物學和地質學雙學位,係當時科學界同政界嘅活躍人物,曾經創辦中國地質研究所,並且作為中國政府代表出席第一次世界大戰後嘅巴黎和會,又同胡適一起鼓吹「好人政府」,與張君勵(1887-1969)等人進行過「玄學與科學」之大辯論,又曾經協助笑面虎孫傳芳管理上海,頗受非議,丁文法曾經主張對日妥協,近年轉向主戰派。丁文江仲係中國第一個系統研究彝(音夷)文嘅人。胡適曾著有《丁文江的傳記》一書,胡適話佢係「一個歐化最深的中國人,一個科學化最深的中國人」。

1月6號,日本商人喺上海設立日鈔金庫,並且發行紙幣,他媽的真係咁都得,個個都能夠發鈔,個金融市場咪立立亂,不過當時嘅情況的確係咁,除咗日本人喺上海發鈔,至去年12月20日至今日廿幾日內,偽滿洲國每週平均發行鈔票1.7835億元,不停印銀紙,可想而知,呢啲鈔票亦會流入中華民國金融市場,你蔣介石搞全國貨幣統一,日本人就嗱嗱臨搞事,同你贈興,貨幣講信用嘅啫,又睇吓你蔣Sir有信用?定係日本帝國有信用?情況去到咁嘅田地,真係唔打仗唔得鳥。

#常威 #蔣介石平反系列  #佛經抄寫員 #中日戰爭 #民國歷史
極端的年代
引用
13/08/2022 12:35
【常公子歷史頻道493回:黃金十年系列之 蔣介石血腥清黨前夕】

作為中國近代史上一場最殘酷血腥嘅籠裏雞作反大屠殺,蔣介石絕對唔能夠推卸佢嘅責任,由孫文「聯俄容共」開始,中共成為國民黨同路人,在第三國際金盧布及軍事大力援助下,國民黨發動北伐戰爭,擊退盤據中原嘅直系吳佩孚同埋孫傳芳,取得整個南方,之後立刻過橋抽板,殘殺同路人!實在天理不容,最重要嘅係,蔣介石嘅清黨所採用嘅手段不堪入目,令人髮指,情況同幾年後1934年發生希特拉嘅「長刀之夜」非常相似,希特拉因無法控制衝鋒隊嘅街頭暴力行動,並視之為對其權力嘅威脅,故用血腥手段除去衝鋒隊及其領導者羅姆,羅姆一直係希特拉嘅戰友同埋最熱烈嘅支持者。然而,發生響1927年嘅清黨事件只係一個開端,之後蔣介石對中共嘅圍剿,延續去到1936年「第二次國共合作」為止,其痛恨中共嘅程度,實在難以估計。當然,歷史話比我哋知,其實蔣介石對中共嘅強烈戒心並非空穴來風,因為最後將佢嘅政權打倒嘅,正正就係中共。

https://youtu.be/ISOPZKBd5HM

#常威 #常威近代史頻道 #黃金十年系列  #民國歷史 #佛經抄寫員
極端的年代
引用
13/08/2022 22:08
[常威近代史]第七百一拾一回 邁進1936年大時代(高清錄音版)

#唔鍾意睇字可以聽

https://m.facebook.com/story.php?story_fbid=pfbid029DhT7AvA9r9CVY88n4srEKia1G5fqibRBNYo5BVT8L3pBaUttoN6gxj9hgiYrYHcl&id=100063598605373
何必問
引用
15/08/2022 10:16
想問講近代,有無講南美、南亞、北美、東南亞?
極端的年代
引用
15/08/2022 13:14
https://upload.hkgolden.media/comment/ldhq1wln.cpio4akowao.k3uebkwjbbu.2ij.jpg


【常威近代史】(七百一拾二回)
上海大新百貨公司開業

1936年1月10號,上海大新百貨公司開業,向永安公司、先施公司、新新公司三大百貨公司發起挑戰。大新百貨公司創辦人蔡昌(1877-1951)與三大公司老闆一樣,同樣為廣東中山人。蔡昌其兄蔡興為香港先施百貨股東。1912年,蔡昌得到蔡興幫助而自立門戶,以400萬港元(當時嚟講一定係天文數字)響中環德輔道中創辦大新百貨公司,1916年,蔡昌將大新業務擴充至廣州市,更於1936年進軍上海市。蔡昌響香港曾經出任東華三院主席及保良局首席總理。1951年7月13日,蔡昌因盲腸炎在香港去世,安葬於香港華人基督教聯會薄扶林道墳場。

大新響上海一開業就咄咄逼人,出手不凡。百貨公司主體係1幢10層高嘅摩天大廈,內裡裝設咗從鋪面直達三樓嘅扶手電梯,新奇!各層都裝有冷暖氣,豪華!地下室係一個寬敞嘅購物商場,因此開業當天就引起上海各界轟動,儘管採用憑券入場和發售兌貨券嘅辦法,亦都冇辦法控制人頭湧湧嘅熱鬧場面。大新百貨公司異軍突起,打破咗上海百貨業由永安居首、先施為次,新新為後嘅原有三大百貨公司壟斷格局。於是三大百貨公司聯手出擊,舉行「春季大減價」促銷,企圖打亂大新陣腳,大新不甘示弱,在地下室另辟廉價部反擊。商戰越演越烈,三家公司有見及此,於是採取斷源戰略,脅迫有關國貨廠家對大新貨源同埋批發價實施控制,逼使大新以房屋同地產為抵押,向英商麥加利銀行(Chartered Bank,即係今日嘅渣打銀行)借款280萬,度過危機,真係商場如戰場,中國人打仗咁叻就好。

1月11號,國民政府公佈《輔幣條例》,發行5分、10分、20分嘅鎳幣,同埋1分、半分嘅銅幣。今日,偽滿洲國公佈1935年嘅全境人口為32,869,045人,其中日本人朝鮮人一共有4,136,932,占總人口嘅大約八分一,3000萬人口,響當時嘅世界絕對係一個超級大國,亦有睇過一啲資料,話當時偽滿州國係世界上第四大經濟體,其實計返個人口量,一啲都唔出奇。1月13號,廣州學生罷課遊行,事後中山大學校長鄒魯(1885-1954)宣佈辭職。1月14號,國民政府特赦為父報仇刺殺笑面虎孫傳芳被判處七年有期徒刑嘅施劍翹(1906-1979),行使正義,可以使用暴力,大概國民政府係要向民眾傳遞這種勇武信息。1月19號,學運持續,北平學生聯合會決議組成全國學聯,繼續南下宣傳抗日。1月20號,教育部通令全國各縣遍設鄉村小學,進一步將教育普及化,同日,准南鐵路通車。
極端的年代
引用
15/08/2022 13:14
1935年1月22號,中華民國外交部聲明否認同意日本對華三大原則,三大原則——就係中國取締一切排日運動;承認偽滿洲國;樹立中日滿經濟合作,實現中日滿共同防共。三大原則當中,其實第一同第三條可以傾,但係第二條承認偽滿洲國獨立,應該就係國民政府嘅底線。1月23號,國民政府通令各直轄機關暫緩推行簡體字工作。1月25號,中共中央發表聲明,表示願意同東北軍聯合抗日。1月26號,蔡楚生(1906-1968)同歐陽予倩(1889-1962)等人發起成立上海電影界救國會。1月27號,上海《晨報》停刋,同日,北平文化界救國會成立。1月29號,國民黨宣佈國難時期嘅教育宗旨。

今個月,國母宋慶齡(1893-1981)傳遞國民黨要求與共產黨談判嘅消息,空穴來風,並非無因,國共之爭,有輕微降溫跡象。高崇民(1891-1971)去到西安,勸說張學良亂共抗日。劇作家曹禺(1910-1996)創作嘅話劇劇本《原野》出版,《原野》係一個史詩式悲劇,故事係響一連串血海深仇嘅背景下展開,主角仇虎父親仇榮,被當過軍閥連長嘅惡霸地主焦閻王活埋慘死,仇家土地被焦閻王搶佔,房屋被燒燬,仇虎妹妹被送進妓院而慘死,仇虎未婚妻金子也被焦家兒子焦大星強佔,做了填房,仇虎自己也被投進了監獄,最後仇虎出獄,向焦家進行報復。單單睇個故事主線,已經慘到冇人有,《原野》通過一個復仇嘅命運悲劇故事,深刻地展示出作家對人生困境嘅困惑以及對神秘宇宙嘅哲學思考,為咗戲劇化地傳達依種認識,《原野》借鑑咗西方表現主義嘅藝術手段,參考咗美國劇作家尤金·奧尼爾(Eugene Gladstone O'Neill,1888-1953)嘅戲劇《瓊斯皇帝》(The Emperor Jones, 1920),並結合中國人嘅欣賞習慣,成功地對戲劇文本嘅敍述方式進行咗新的探索,喺當時嚟講,係走在藝術最前線。

1936年1月,中國左翼國家聯盟宣佈解散。今個月,寧夏省道管理處改為汽車管理局。由於寧夏汽車運輸價格高昂,故大部分貨物只可以通過黃河水運出境,省道管理處嘅汽車營運業務錄得虧損,寧夏汽車管理局成立後,調整機構,精簡人員,以客運為主,貨運為輔,降低成本價格,擴展營運路線,改貨主隨車押運為運輸單位保運,呢啲措施嘅實行,令到寧夏汽車管理局經營漸有起色。

1936年1月於然結束。

#常威 #蔣介石平反系列  #佛經抄寫員 #中日戰爭 #民國歷史
極端的年代
引用
17/08/2022 11:23
[常威近代史]第七百一拾二回 上海大新百貨公司開業(高清錄音版)

#唔鍾意睇字可以聽

https://m.facebook.com/story.php?story_fbid=pfbid0tiZfvQ9V3j5aSHeTm1Kb95RPi6afqKCyhsgTYxjTNmRuxikb3rUxK3gcLzG1z7Lsl&id=100063598605373
極端的年代
引用
19/08/2022 20:11
https://upload.hkgolden.media/comment/55xfjpq0.llbbp2am4lp.hzujcu10uqy.3om.jpg

【常威近代史】(七百一拾三回)
十年生死兩茫茫

時間線進入1936年嘅2月,2月1號,中華民族解放先鋒隊係北平成立,意識形態武裝組織。同日,禁煙總會要求喺6年內禁絶烟毒,遺禍中華民族差不多100年嘅鴉片烟毒,終於到咗尾聲,中間毒害咗幾多人?根本無法統計,我再重申一次都唔怕厭,中華民族由清帝國中後期開始嘅衰落,同鴉片有好大關係,唔會冇關係。而鴉片好快會消失,不過取而代之嘅係更多種類嘅不同毒品供應全世界市場,五花八門,各式其式,你要好high又得,中high又得,小小high又得,到咗今時今日21世紀,毒品依然係一個全球性嘅大問題,亦由此可以反映出,人類真係有舖「吸毒」嘅嗜好,我諗有人類一日,毒品永遠都會存在,唔會消失。2月1號,左聯所編《新文化》響上海創刋,雖然上個月中國左翼作家聯盟宣佈解散,但文壇裡仍然不乏有心人積極宣傳馬克思主義,文人傾左,正常過唔正常。

2月4號,國民政府決定發行「統一」及「復興」兩種公債,繼續努力籌錢打仗,打仗可以話係世上最高消費嘅活動,每射出一粒子彈,每擲下一枚炸彈,每死一個人……其實都係錢,都係一個政權嘅最大膽投資,有投資就要有回報,所以去解說一場戰爭,必須要諗「回報」係啲乜?世上冇人會投資一隻無回報嘅股票,相信亦都相當清楚,請嘗試用「利益關係」或「錢銀角度」去理解戰爭,可能好多嘢都清楚好很多。

2月5號, 上海大康沙廠4000名工人因日本監工毒打工人梅世鈞致死而舉行大罷工,日本人真係無惡不作,直情係魔鬼,戰爭前夕,每一個人都要有呢方面嘅理解同覺悟先得。2月7號,蘭州發生大地震,同日,根據《中央快報》報導,全國囚犯約有10萬人,以4億人口計算,囚犯數目一啲都唔算多了,每4000人只有一個囚犯。2月8號係元宵節,國民政府監察院委員杜羲(1880-1936)因為憂心國事,自投南京玄武湖自殺,引起舉國震驚,杜羲係國民黨元老級人物,曾經入讀過日本早稻田大學。
極端的年代
引用
19/08/2022 20:12
2月10號,銅幣、鎳幣開始正式發行,流通市面。2月11號,國民黨中宣部發表《告國人書》,要求國民勿受人利用。2月12號,隴海鐵路西安至咸陽段火車通車。同一日,日滿軍隊佔領貝爾湖附近嘅克蘭夫都克。2月13號,美國財政部長宣佈幫助解決中國幣制問題,之前中華民國搞貨幣統一,係由英國首席經濟顧問李滋羅斯(Frederick Leith-Ross,1887-1968)一手促成,而家美國又話幫手,好明顯係一黨人。2月14號情人節,蘇聊政府關閉駐瀋陽總領事館,2月18號關閉駐哈爾濱領事館。2月15號,根據《中央日報》報導,全國公營私營圖書館一共有2925所;同日,上海至東京無線電話通話,即係可以由上海直接打電話去東京。

2月20號,《大眾生活》等24種抗日刊物被查禁;中法會商修正《滇越鐵路章程》簽字,當時嘅越南,已經係法國嘅殖民地。同日,國民政府頒佈《維持治安緊急辦法》,禁止學生運動。今日,2月20號晚上8點,紅軍抗日先鋒隊10000人東渡黃河。先鋒軍沿黃河北起綏德溝口,南至清澗沙口約100餘里地段同時強渡,徐海東(1900-1970)紅15軍響石樓縣東辛關沿岸突破,次日佔領義牒鎮、劉村一帶,以一部包圍石樓縣城,大部直奔中陽縣東山、關上。大名鼎鼎嘅彭德懷(1898-1974)紅1軍團喺中陽縣坪上村登岸,殲滅敵軍71師1個營,次日破曉佔領三交鎮,22號佔領留譽鎮,再向關上村進擊。去到2月23號,辛關至三交鎮口之間各渡口均被紅軍攻佔,渡河戰鬥結束。

空穴來風,並非無因,國共兩黨果然恢復接觸,今個月,蔣介石委派駐莫斯科武官鄧文儀(1905-1998)同中共駐共產國際代表王明(1904-1974),喺莫斯科會談,國共兩黨自1927年412清黨大屠殺決裂後,近10年後首次恢復官方接觸。去年冬天,國民黨先由宋子文(1894-1971),後由陳立夫(1900-2001)主持,尋求同中共嘅聯繫。通過左翼歷史學家呂振羽(1900-1980)搵到中共北方局嘅周小舟(1912-1966),周小舟向國民黨傳達國共合作嘅條件:1.組織國防政府和抗日聯軍;2.停止內戰,一致抗日,停止進攻蘇區,承認蘇區合法地位等等。我哋嘅國母宋慶齡(1893-1981)亦都直接溝通咗國民黨同陝北嘅中共聯繫,佢委託上海聖彼得教堂牧師董建吾(1891-1970,董建吾唔係基督教牧師,牧師只係掩飾佢嘅共產黨黨員身份)前赴陝北瓦窰堡,向中共中央傳遞國民黨要求談判嘅信息。莫斯科嘅王鄧會議,鄧文儀表示蔣介石決定同中共談判,並提出取消中國蘇維埃政府,改編中國紅軍為國民革命軍等建議。王明建議同國內嘅中共同紅軍領導建立直接聯繫,以便談判具體條件,隨後,中共駐共產國際代表委派潘漢年(1906-1977)回國,向中共中央傳達信息,促成國共兩黨之後嘅直接談判發生。

#常威 #蔣介石平反系列  #佛經抄寫員 #中日戰爭 #民國歷史
極端的年代
引用
20/08/2022 11:58
【常公子歷史頻道494回:黃金十年系列之 十步殺一人 千古也留痕】

在白崇熹部隊控制上海之後,蔣介石反轉豬肚,開始血腥清黨行動,這就是中國近代史上最血腥的「412清黨行動」,蔣介石糾同上海黑幫,向上海嘅革命工人同埋共產黨進行血腥大清洗,其令人髮指嘅程度,可說是近代史上少見。不經過任何審訊或司法程序,當街殺人,而且殺嘅,仲係不久之前共同進退、共同作戰嘅自己人。其醜惡嘅程度,足可以媲美希特拉屠殺500萬猶太人。國民黨同共產黨之後所種下嘅百年恩仇,亦係由1927年4月12號開始,一直強調法統重光嘅國民革命,由一開始,就唔尊重法統為何物,難怪之後蔣介石嘅統治,變得困難重重。「信用」係一樣非常重要嘅事物,信守承諾同合約精神,基本上係建設整個社會制度嘅樞紐,高壓手段同暴力鎮壓的而且確可以平反亂局,但係要人心真正歸附,真正認同你蔣介石南京政權,單靠暴力,歷史上講畀我哋知係唔可以。依一次412事件,亦展開了蔣介石之後長達十年、勞民傷財嘅「剿匪行動」,亦即係長期內戰,直到1936年中日戰爭前夕,國民黨同共產黨先至恢復最低限度的官方接觸……

https://youtu.be/NfPiG0PO8rE

#常威 #常威近代史頻道 #黃金十年系列  #民國歷史 #佛經抄寫員
極端的年代
引用
21/08/2022 15:59
[常威近代史]第七百一拾三回 十年生死兩茫茫(高清錄音版)

#唔鍾意睇字可以聽

https://m.facebook.com/story.php?story_fbid=pfbid025oV9g1Kym2efd2QTnyyfDPuZvpx6GGx9igdKY719ZMxERm8fNEwumi1D3MechVY2l&id=100063598605373
極端的年代
引用
22/08/2022 12:43
https://upload.hkgolden.media/comment/mka4hlp1.3im2k4uxpkj.pscvnckpe3j.fhq.jpg


【常威近代史】(七百一拾四回)
丁丁歷險記

1936年2月21號,行政院命令教育部禁止平津學生聯合會活動,一定要刹停學潮,中日雙方神經已經非常繃緊,戰爭一觸即發(當然你亦可以理解侵華戰爭已經發生咗好耐),不過又係嗰句,大火未燒到門口,即係真正戰爭未爆發之前,好多人都係主戰派(口頭),包括天真無邪嘅學生在內。情況同當年甲午戰爭爆發前都好相似,慈禧太后李鴻章不主戰,反而光緒皇帝同其他熱血上頭者就主張同日本人死過,結果大家都睇到係點?響戰爭發生前,想去全力避免戰爭發生的人,好多時候都會俾人鬧做賣國賊或者叛徒,最低限度會俾人話係冇膽匪類。Sorry,我唔係同汪精衛講好說話,佢係大漢奸,勾結日本人。我只係想講,戰爭真係唔係講笑,可以避免就應該避免,生靈塗炭唔係一個成語咁簡單,真係發生喺你面前,你先至會知道佢嘅威力有幾咁震撼。目前筆者所身處的這個時代裡,正正就係有唔少人鼓吹戰爭發生,可能你會話,吹下水啫,你講我又講,使乜咁認真呀?但係我想話畀大家知,讀過歷史嘅人都知道,第一次世界大戰就係大家不停咁樣吹而吹出嚟,今日二十一世紀進入互聯網世界,資訊傳播嘅速度同量係20世紀初期嘅數以百倍,當年可以發生嘅事,今日更加容易發生。當大火燒到自己門口,到時後悔就太遲鳥。

2月21號,江蘇鎮江上空出現巨大流星一顆,劃過長空,唔知係咪上天有所啟示,大災難即將來臨。2月22號,著名教育家陶行知(1891-1946)領導嘅國難教育社喺上海成立。同日,國民政府訓令規定《土地法》及《土地法施行法》均自3月1號起施行。1926年,國民政府係廣東試行「二五減租」政策,目的在於改善地主同農民嘅關係。所謂「二五減租」,就係指當時佃農繳納給地主嘅佃租,普遍採取分益佃租方式,而其比例通常是收穫總量嘅50%,大咬到飛起。「二五減租」就係將繳納給地主嘅50%的佃租,減去至25%,即係比四份三,咁樣,佃農嘅收入就會增加,當然我相信,冇一個地主會鍾意,收少個崩租喎,你不如殺撚咗我好過喇。1928年,國民政府又響湖南、湖北、浙江等省試行「二五減租」政策。1930年6月30號,國府正式頒佈《土地法》,1935年4月4號佈《土地法施行法》,去到1936年2月,卒之正式執行。《土地法》其主要內容包括有,1.全國人民土地所有權平等;2.根據地值,賦稅平等;3.促進耕者有其田;4.限制地主大量擁有土地;5.比照土地所有量,採行漸進稅率;6.保護佃農及自耕農利益。《土地法》嘅執行,其目的在於拯救中國國內過億嘅農民生計,希望增加佢哋對國家或政權嘅歸屬感,不過講就容易,《土地法》執行起上嚟應該有一定困難,地主同土豪劣紳唔係同你講笑,咁容易俾你一兩條法例玩到,就唔使鬥地主啦。
極端的年代
引用
22/08/2022 12:43
土地係一切生產嘅源頭,困擾今時今日香港嘅,一直都係土地問題,從前係耕者有其田,今日係居者有其屋,其實都係土地問題,都係地產問題。香港成也地產,敗也地產,有咁耐風流,有咁耐折墮。更加可以講,土地除咗係一切生產嘅源頭,仲係一切政治嘅源頭。

2月22號,留學比利時嘅畫家、張充仁(1907-1998)喺上海舉行畫展,張充仁長於繪畫同雕塑,20世紀20年代初,赴比利時留學,結識咗比利時國寶級漫畫家艾爾吉(1907-1983,《丁丁歷險記》作者),兩人成為摯友。學成後,張充仁遊歷歐洲從事創作,抗日戰爭爆發後回國參加救亡運動。1949年後,張充仁陸續響上海美術專科學校,交通大學等學校任教,同時進行創作。80年代,為鄧小平創作雕塑,1980年代後期,張充仁旅居法國。1998年10月8日病逝於巴黎。張充仁與艾爾吉嘅友誼,令佢成為法語國家最為知名中國人之一,他不僅幫助艾爾吉完成咗《丁丁歷險記》中關於中國嘅一部作品——《藍蓮花》,更成為咗其中的主角——張。兩人因戰爭失散後,艾爾吉為表達思念,又創作咗以「張」為主角嘅《丁丁在西藏》。1981年,兩人響布魯塞爾重逢。

1936年2月23號,蔣介石調兵20萬入晉,堵截紅軍東征。一邊醞釀同你談判,一邊繼續打你,兩手準備。2月26號,歐亞航空公司京滇線試航成功。2月28號,孔祥熙(1880-1967)任整理內外債務委員會委員長。講多次都唔怕厭,我真係好唔明白孔祥熙同宋子文究竟可以做幾多嘢?樣樣嘢都有佢哋份?點搞丫?2月29號,北平憲警兩次進入清華大學逮捕學生。今個月,中共中央軍委華北局聯絡書記王世英(1905-1968)前赴西安,秘密會見楊虎城(1893-1949),驚天動地嘅「西安事變」快將發生。今個月,香港大學中文系系主任許地山(1893-1941)發起香港首次集體結婚活動。許地山係台灣台南人,二十世紀上半葉中國作家、學者。許地山係二十世紀中國在大學開梵文課嘅第一個華人,係研究印度學嘅先行者,編有北京商務印書館版《梵語課本》同《梵語詩文圖解》等書籍。

1936年2月於焉結束。

#常威 #蔣介石平反系列  #佛經抄寫員 #中日戰爭 #民國歷史
極端的年代
引用
24/08/2022 00:10
[常威近代史]第七百一拾四回 丁丁歷險記(高清錄音版)

#唔鍾意睇字可以聽

https://fb.watch/f4Jn9bkiFO/
極端的年代
引用
25/08/2022 12:43
【常公子歷史頻道495回:黃金十年系列之 打開血腥焚國之路】

蔣介石清黨嘅「412大屠殺」終於發生,蔣介石聯同上海黑幫,率先非法血腥處決共產黨人同工會份子,其手法之血腥低劣,實為近代史上少見。蔣介石出手,而且用咁極端嘅手段清黨,亦都想表達一個意思——就係佢絕不回頭,打算將共產黨人用完即殺。其他軍閥或勢力睇見咁嘅環境,亦只有兩條路可以揀,一係跟風,一係唔跟,當然亦有好多中間派騎牆派見風駛悝派。武漢以汪精衛為首嘅國民黨左派,就選擇咗即時同南京嘅蔣介石割蓆,產生兩個中央,即歷史上所謂嘅「寧漢分裂」。其餘好多軍閥好似李濟琛都選擇跟風,一齊屠殺共產黨人,至於理由點解?我自己都唔太清楚。「412大屠殺」其實係蔣介石嘅一次政治豪賭,我諗佢事前,並唔會太清楚清黨事件發生後嘅一切後果同後遺症,總之殺左先算,總之首先處理咗眼前嘅問題先算,失信於天下?遲啲再講。順帶一提,當時蔣介石嘅親生仔蔣經國亦都身在莫斯科學習馬克思主義,清黨行動,無疑將蔣經國置於一個極度危險嘅境況裡頭。不過既然稱得上是一場政府豪賭,蔣介石已經曬冷,兒子嘅生死,大概唔係佢考慮範圍之內。

https://youtu.be/9J9lhXPsVXc

#常威 #常威近代史頻道 #黃金十年系列  #民國歷史 #佛經抄寫員
極端的年代
引用
26/08/2022 13:05
https://upload.hkgolden.media/comment/vodruvlo.v3m2vbh5ib4.ptplnndqszm.l1l.jpg

【常威近代史】(七百一拾五回)
全世界開始滾瀉屎

時間線進入1936年嘅3月,山雨欲來風滿樓。3月3號,根據《大公報》報導,河南省通誌編綦成書500卷,耗資50萬元,歷時18年。3月4號,張學良會見李克農(1899-1962),就聯合抗日問題交換意見。李克農早年響上海從事中共地下工作,被稱為「龍潭三傑」之一。響中央蘇區任紅一方面軍政治保衛局局長,長征到達陝北後,參與國共談判。抗日戰爭時期,響國統區從事統戰工作,後任中共中央社會部副部長。國共內戰時期,任中共中央社會部部長,長期負責情報工作。中華人民共和國成立後,任中華人民共和國外交部副部長、中國人民解放軍副總參謀長、中共中央調查部部長等職。李克農係中國人民解放軍開國上將中,唯一一位沒有帶兵打仗歷史嘅人,被稱為中共嘅「特務之王」。

3月5號,國際勞工局中國分局發表1935年中國失業人數報告,失業者一共達5,893,196人,其中以廣東省為最多。依類報告有幾大真確性,真係好值得商榷。以當時中國4億人口計算,假設就業人口為一半2億左右,如果失業率只有區區600萬,咁就只係3%,一啲都唔算高丫,不過依份失業人口報告,有冇包括廣大嘅農民在內?抑或只係計算各大城市內嘅工人人口?咁就真係冇詳細資料。3月5號,日本使節有田到任,3月7號喺南京接見記者時候講:「此次奉使來華,日政府曾付以解決日中問題之方案,關於華北與滿洲國問題,需就地按廣田所定三原則解決。」3月10號,日本首相兼外相廣田弘毅(1878-1948)再重申這一主張。同你講到明,中華民國南京政權需要承認偽滿洲國合法地位,而華北亦唔關你事(必需分離)。3月20號,有田離開嘅時候向蔣介石講:「關於中日關繫之調整,深信在廣田首相兼任外相及本人任駐華大使之際,乃屬絕好時機,此機一失,在最近之將來,殊不易再逢。」向你蔣介石南京政權提出最後通牒,承認「廣田三原則」係避免全面戰爭嘅最後機會。整個南方,可以係你蔣介石嘅,但係北方,就要係日本帝國(滿洲國)嘅,條件就係咁,辣就辣少少,睇你受唔受囉?我再講多次都唔怕厭,接受條件?大概可以換來二三十年風平浪靜,但日本勢力喺北方繼續坐大,遲早一定會吞拼埋整個南方,我諗當時蔣介石要考慮嘅,亦係呢個未來嘅大方向。
極端的年代
引用
26/08/2022 13:06
況且去到1936年,整個世界局勢已經開始滾瀉屎,蘇聯嘅史太林(Joseph Jughashvili Stalin,1878-1953)對國內進行嘅大清洗已經到達尾聲,開始集中所有權力於一身;德國納粹希特拉執政已經有一段日子,亦為歐洲全面戰爭做好準備;美國羅斯福(Franklin Delano Roosevelt,1882-1945,從1933年至1945年間連續出任四屆美國總統)政權誕生;英國由財務大張伯倫(Arthur Neville Chamberlain,1869-1940)主導下,向納粹德國同日本採取綏靖工作。叉開一筆,後世人對張伯倫嘅綏靖主義彈多個讚,認為就係佢懦弱,先畀希特拉彈起,主戰派邱吉爾(Sir Winston Leonard Spencer-Churchill,1874-1965)先係絕對光榮正確。但係我想講,張伯倫就係嗰啲響戰爭前夕,儘量希望避免戰爭發生嘅人,況且張伯倫心中非常明白,經過第一次世界大戰後,稱雄世界百幾年嘅日不落帝國英國已經五癆七傷,再打多一次仗,世界霸主地位就要拱手相送於他人,退居二線國家地位。事實勝於雄辯,第二次世界大戰落幕之際,亦係日不落帝國大英帝國日落之時。

3月8號,上海各界萬幾人舉行反日大示威;3月9號,川皖發生饑荒。3月13號,天津、秦皇島海關與北寧路局訂立《華北緝私辦法》,當時立立亂,走私問題相當嚴重,今個月,單單天津、秦皇島、煙臺、龍口四個海關,稅收損失約50%,真係好大件事!3月15號,汪精衛抵達德國首都柏林療傷,我諗療傷只係一個藉口,汪精衛去柏林應該係傾軸心國依單大叼勒。3月18號,上海郵政管理局試辦投遞包裹業務,即係順豐速遞囉。3月19號,天津魚販數萬人反對增收魚棧費,全體罷市。同日,安陽小屯殷墟進行第13次發堀考古工作。3月20號,蘇聯大使抵達南京,接洽中蘇外交事宜。3月22號,日本唆使德王德穆楚克棟魯普(1902-1966)成立蒙古自治軍政府;3月23號,根據天津大公報報導,四川各縣發生大饑荒,甚至出現人食人嘅慘劇,人相食,仲唔係水深火熱?

今個月,劉少奇(1898-1969)到達天津,重組中共中央北方局。中共中央北方局1927年9月成立於天津,書記為王荷波(1882-1927)。同年12月撤銷,1930年春天再度組建,歷年來,北方局喺白色恐怖中遭受嚴重破壞。劉少奇上任後,北方局聯合華北一切傾向抗日嘅黨派及階層,進行咗爭取國軍第29軍嘅工作。同時,劉少奇又重建北平、天津嘅黨組織,成立咗山東省委、山西省委及河南工委。當然劉少奇當時工作係要秘密進行,否則一定人頭落地,死無葬身之地。


#常威 #蔣介石平反系列  #佛經抄寫員 #中日戰爭 #民國歷史
極端的年代
引用
27/08/2022 12:21
【常公子歷史頻道496回:黃金十年系列之 李大釗之死】

李大釗是死奉系張作冧之手,我以李大釗之死作為歷史的分水嶺,其意義在於,在李大釗死前,一切還是有理可尋;現在李大釗死後,整個中國近代史,變得毫無道理可言,進入一片血腥殘酷的殺戮鬥爭。李大釗和陳獨秀是兩個最早把馬克思主義思潮引入中國的學者文人,也成為中國共產黨的始創者,李大釗更加直接影響毛澤東——這個在中國近代史上最重要的歷史人物。作為一個文人學者,眼見國家民族崩分離析,人民生活水深火熱,一腔赤誠只想力挽狂瀾,救國救民,馬克思主義或共產主義是否靈丹妙藥?當時的人大概並不知道,畢竟實踐才是檢驗真理的唯一凖則,他們只知道目前面對的境況或政治制度實在太不堪入目,因此希望用另一種社會制度去救國救民,李大釗死的時候祇有38歲,其實相當年輕,他為夢想而獻身,讓自己堅信的理念得以傳承下去,李大釗死後,整個中國近代史,亦變成了國民黨與共產黨兩黨鬥爭為主軸的歷史,直至今時今日,仍然沒完沒了……

https://youtu.be/dn5HpmzvrjY

#常威 #常威近代史頻道 #黃金十年系列  #民國歷史 #佛經抄寫員
極端的年代
引用
28/08/2022 13:32
[常威近代史]第七百一拾五回 全世界開始滾瀉屎(高清錄音版)

#唔鍾意睇字可以聽

https://m.facebook.com/story.php?story_fbid=pfbid027swypfZJJkhe4kaZAU7eW8VUP5s5BTKaAtXXGbdeaQGbfJimYQHq16DKJJcucHr2l&id=100063598605373
極端的年代
引用
29/08/2022 12:35
https://upload.hkgolden.media/comment/eobgfzqh.sa3a1cktm1u.bqt554osx04.5co.jpg

【常威近代史】(七百一拾六回)
差利卓別靈訪華

1936年3月9號,美國著名影星差利卓別靈(Sir Charles Spencer "Charlie" Chaplin,1899-1977)訪華,引起舉國閧動,真係邊個唔識差利?差利卓別靈係著名嘅世紀級喜劇演員,亦係一個著名嘅反戰者,亦係一個著名嘅左翼,佢被認為係當時嘅大左膠,當然,佢嘅政治觀點亦真係左傾,佢所拍攝嘅電影,大多數反映貧苦大眾的悲慘生活狀態,批判資本主義嘅無情剝削,但差利嘅左傾,用今天嘅角度去睇,其實相當溫和。

我個人亦相信,直至今時今日美國荷里活電影世界嘅(稍稍)左傾立場,其實都係同差利卓別靈有關。差利卓別靈支持蘇聯,支持中華人民共和國建國,支持共產主義支持社會主義,美國聯邦調查局嘅局長胡佛(John Edgar Hoover,1895-1972),亦曾經認為差利卓別靈係共產黨,同佢開咗個file查佢,喺美國50年代反共嘅「麥卡錫主義」(McCarthyism)高潮,差利卓別靈嘅鮮明政治立場更加成為眾矢之的,1952年更加離開美國,差利發表聲明稱: 「自從上次大戰以來,我就成了強勢反動團體製造的謊言和宣傳的目標,他們有影響力,有美國黃色媒體的幫助,創造了一種氛圍,纔讓有自由意識的人都被凸顯,並受到迫害。因此我已無法進行電影工作,我將放棄在美國的居留權。」,差利離開美國後,佢決定留在歐洲,舉家定居瑞士,期間差利遊歷各國,見過藝術家巴勃羅·畢卡索(Pablo Ruiz Picasso,1881-1973)、英國女王伊麗莎白二世(Elizabeth II,1926-)、愛因斯坦(Albert Einstein,1879-1955)、法國總統戴高樂(Charles André Joseph Marie de Gaulle,1890-1970)、赫魯曉夫(1894-1971)、同周恩來(1898-1976,在日內瓦會議期間)等人,星光熠熠,直到1972年83歲高齡嘅佢同夫人短暫回訪美國,領取奧斯卡最高榮譽獎項,其間所有人起立鼓掌接近5分鐘,差利卓別靈嘅偉大電影事業雖然奠基於美國,但佢從來冇入藉美國,我諗佢亦唔鍾意高度資本主義化嘅美國。

1975年3月9日英女王伊麗莎白二世女王授予卓別靈KBE勳銜,封佢為爵士。1931年和1956年就已經有人提名將卓別靈封為爵士,但當時嘅保守派政府反對。1977年聖誕節,卓別靈在瑞士家中中風逝世,享壽88歲。1978年3月,有人響墳墓盜走咗卓別靈遺體,勒索家屬要錢,之後盜墓者被捕,11周後差利遺體在日內瓦湖附近被尋回,如今差利被葬在六英尺水泥下面,以防再發生類似事件。
極端的年代
引用
29/08/2022 12:35
1936年3月25號,上海市公安局逮捕復旦大學救國會成員;3月26號,國民政府以《四庫全書》贈予蘇聯對外文化交誼會,同日,山西王閻錫山(1883-1960)制定「學生自首及檢舉共產黨辦法」,如果能夠舉報他人者,可豁免學費。3月29號,蘇聯宣佈與外蒙定立「互助條約」。3月30號,吉林抗日救國會遭日偽軍警破壞。今個月,中華全國火柴產傾銷聯營總社喺上海成立。國產火柴喺稅款上昇同日本火柴走私猖獗嘅雙重壓力下,經營狀態悽慘,火柴大王劉鴻生(1888-1956)團結同業,一致對外。1935年7月,華中地區華商火柴同業成立咗聯合辦事處,此時日商只得讓步,雙方達成協議。中華全國火柴產銷聯營總社嘅成立,係一定程度上,將日本火柴勢力限制喺華北、山東、河南一帶,維持咗國產火柴傾銷市場。2蚊火機仔未發明之前,火柴真係好重要。

今個月,廣州灣法國殖民當局喺坡頭推行變相「人頭稅」,喺當局宣佈嘅「義務公役法」中規定,16歲至40歲嘅男子每個月要自帶工具同伙食到指定嘅地點做4日勞役,拒絕返工嘅人,每人每天可以畀越南幣4角代役。「義務公役法」遭到當地居民反對(點解唔反對?),6月10號,當地鄉民成立「坡頭群眾被迫自救會」,有30000人參加,共同抵抗法國當局嘅「義務公役法」。西方列強有幾仆街,西方列強就係咁仆街。

今個月,中法航空聯運自西貢至廣州航線,開始試辦。國民政府資源委員會制定「重工業五年建設計畫」,決定投資2.7億元,響全國各地興建冶金、化工、原料同機械等企業。另外,中共中央政治局喺山西西部召開會議,討論發展抗日民族統一戰線同直接對日作戰問題。同時,中共北方局派周小舟(1912-1966)專程前赴中華民國首都南京同曾養甫(1898-1969)會談,相談兩黨直接談判嘅可能性。今個月,中國左翼國家聯盟自動解散,內政部亦重定禁止蓄婢辦法。鴉片煙,奴婢、妾侍填房同紮腳依啲驚世中華劣質文化遺產,一早應該要清除!不過以我個人觀察,就香港呢笪地方而言,真係要去70年代先完全絕跡!

1936年3月於焉結束。

#常威 #蔣介石平反系列  #佛經抄寫員 #中日戰爭 #民國歷史
極端的年代
引用
31/08/2022 11:20
[常威近代史]第七百一拾六回 差利卓別靈訪華(高清錄音版)

#唔鍾意睇字可以聽

https://m.facebook.com/story.php?story_fbid=pfbid02NpkVSwopJ923DtEsRDDv9sZWoR9TD3FwmgNxUSJkFVY3REwjueZJkz7hV1UiezP1l&id=100063598605373
極端的年代
引用
01/09/2022 12:31
https://upload.hkgolden.media/comment/qhdxevjs.gtu1ibrrvt4.qxvkeyoeyrb.egx.jpg


【人人都話要載入史冊 真係人人都可以咩?】

昨日一個真正可以載入史冊嘅人走了,他是戈爾巴喬夫(1931-2022),回看歷史,蘇聯這個叱吒風雲、雄霸了半個地球近半個世紀的共產主義國家,就在戈爾巴喬夫一手促成下無聲解體,在其解體過程中所流的血和平靜程度,可以講係歷史上罕見嘅事例。一切都是由戈爾巴喬夫所製造出現,冇咗佢,外強中乾嘅蘇聯之後會點樣走?真係冇人知道,或者會爆發第三次世界大戰核子戰爭都未定,我講真,可能性真係會有。

戈爾巴喬夫大概就係我最近成日講響殘酷戰爭或大混亂前儘量避免戰爭爆發、負責刹車嘅人,無論如何,依種人應該值得被尊敬。1991年,因「蘇東波」效應大國瞬間解體之後,亦冇太多人懷緬呢個超級大國喺過去80多年製造出嚟嘅光榮事蹟,大概民心同民意己經講俾大家知道,蘇聯依個大國形象響一般人心中嘅印象有幾差,係差到冇乜人想再掛在口邊。蘇聯解體最大嘅意義,大概就要話畀我哋嘅祖國知道,之後實踐社會主義嘅道路應該點樣走?蘇聯解體,係成就咗中國響二十一世紀嘅強大崛起,所以每一個中國人都應該多謝戈爾巴喬夫嘅「震盪式療法」偉大政治實驗。

之後一段日子,戈爾巴喬夫亦被人批評過佢做錯事,令堂堂大國蘇聯無聲解體,令整個世界進入美國獨大自由主義氾濫嘅貧富懸殊高度資本主義格局,只不過,應該唔關戈爾巴喬夫事,佢只係做咗佢覺得自己應該做嘅事,之後嘅歷史點發生,我諗佢並唔知道,佢亦唔係神,亦都冇能力操控未來。

仲有,戈爾巴喬夫絕對有資格載入史冊,這一點就無可否認。

#常威 #戈爾巴喬夫  #蘇聯
前往 電腦版網頁
© 2022 HKGolden.com. All Rights Reserved.
Terms and Conditions     [email protected]